आमसभाका लागि एमाले अध्यक्ष ओली चितवन आउने

चितवन / नेकपा एमाले अध्यक्ष तथा पूर्वप्रधानमन्त्री केपी शर्मा ओली आज (आइतबार) चितवन आउँदै छन् । ओली नेकपा (एमाले) चितवनले आयोजना गरेको आमसभालाई सम्बोधन गर्न चितवन आउने भएका हुन् ।
क्याम्पाचौर हुने आयोजनाको आमसभालाई ओलीलगायत सुरेन्द्र पाण्डे, रामबहादुर थापा ‘बादल’, राप्रपा उपाध्यक्ष विक्रम पाण्डेलगायतका नेताले सम्बोधन गर्ने कार्यक्रम रहेको छ । आमसभा दिउँसो १२ बजेदेखि सुरु हुँदै छ भने ओलीले दिउँसो २ बजे मात्रै सम्बोधन गर्ने कार्यक्रम रहेको छ ।
गठबन्धनका दलले केन्द्रीय बसपार्कमा आयोजना गरेको आमसभाको मञ्च पानीले डुबानमा परेपछि एमालेले क्याम्पाचौरमा आमसभा गर्न लागेको हो । आमसभाको तयारी बारे एमाले जिल्ला प्रचार विभागले शनिबार पत्रकार सम्मेलनमार्फत जानकारी गराएको थियो ।
भरतपुर महानगरपालिकामा एमाले–राप्रपा तालमेल गरेका छन् । भरतपुरको मेयरमा एमालेका विजय सुवेदी र उपमेयरमा राप्रपाकी हिमला गुरुङको उमेदवारी रहेको छ । मौन अवधी सुरु हुन तीन दिन मात्रै बाँकी रहँदा उमेदवारहरुले चुनावी घरदैलोलाई तीव्र बनाएका छन् ।
यसअघि पाँच दलीय गठबन्धनले वैशाख २२ गते भरतपुरमा चुनावी सभाको आयोजना गरेको थियो । गठबन्धनका नेताहरुले गरेको विरोध र आरोपको जवाफ आज ओलीले सार्वजनिक कार्यक्रम मार्फत दिँदै छन् ।