राप्ती ७ मा एमालेकी वागी उमेदवार सुमिता डल्लाकोटी भारी मतले विजयी

– बबिलाल / दुर्गा
चितवन । देशैभर स्थानीय तह निर्वाचनको मतगणना जारी छ भने दलहरुको सोचेभन्दा मत परिणाम ठीक विपरीत आउँदै गरेको पाइएको छ । चितवन जिल्लाको विभिन्न स्थानमा कांग्रेसको गढ र एमालेको गढ मानिएको स्थानमा परिणाम ठीक विपरीत पुष्टि हुँदै गएको छ ।
ठूला दलहरुका केन्द्रीय नेताहरुले दिएको निर्देशन जिल्लाका नेताहरुले अटेर गर्दै बागी उमेदवारी दिनेको पनि लर्को लागेको छ । यसबाट जिल्लाका नेताहरुमा व्यापक असन्तुष्टि रहेको पुष्टि भएको हालैको स्थानीय तहको निर्वाचनले देखाएको छ ।
पाँच दलिय गठबन्धन एकातर्फ छ भने अर्कोतर्फ एमालेका नेताहरुमा पनि असन्तुष्टि रहेको पाइएको छ । असन्तुष्टि रहेका कारण जिल्लाका केही नेताहरुले बागी उमेदवारी दिएर सक्षम रहेको प्रमाण समेत दिएको छ ।
यसैबीच राप्ती नगरपालिका वडा नं. ७ मा नेकपा एमालेकी सुमिता डल्लाकोटीले बागी उमेदवारीबाट विजयी हासिल गरेकी छिन् । उनले एमालेबाट टिकट प्राप्त नभएपछि स्वतन्त्र रुपमा उमेदवारी दिएर विजयी भएकी हुन् । उनको चुनाव चिन्ह गुलाफ हो ।
डल्लाकोटी वडावासीमा निकै लोकप्रिय रहेकी छिन् भने उनीहरुकै आग्रहमा बागी उमेदवारी दिएकी हुन् । पार्टीले अवसर नदिएपछि बाध्य भएर बागी उमेदवारी दिएको र विजयी हुने पूर्ण विश्वास रहेको उनको विश्वास थियो ।
उनले १११० मत ल्याएर विजयी भएका हुन् भने उनका प्रतिद्वन्द्वी एमालेका छबिलाल भुषालले ४१६ मत मात्र प्राप्त गरेको हो । डल्लाकोटीले भारी मतका साथ एमालेका भुषाललाई पराजित गरेको हो ।
यस्तै राप्ती नगरपालिकामा गठबन्धनका मेयर शमशेर लामाले अग्रता कायम नै गरेको छ । लामाले ७४६४ मत प्राप्त गरेका छन् भने उनका प्रतिद्वन्द्वी एमालेका गोविन्द कंडेलले ७२१९ मत ल्याएका छन् । उपमेयरमा एमालेकी मेनुका पाठक ७३७९ मत, गठबन्धनका देवेन्द्र लामाले ७५५९ मत प्राप्त गरेका छन् । हालसम्म राप्ती नगरपालिका ६,४,५,१२,८ र ७ को मत गणना भैसकेको छ ।