यात्रा ग्रुपले उचाल्यो दोस्रो यु १५ फुटबल च्याम्पियनको उपाधि

चितवन / वातासिनो दोस्रो यु१५ नाइन ए साइड फुटबलको उपाधि यात्रा ग्रुप भरतपुरले जितेको छ । प्रतिस्पर्धात्मक फाइनल खेलमा सेम्रेनी एफलाई टाईब्रेकरमा पराजित गर्दै यात्राले उपाधि जितेको थियो । टाईब्रेकरमा यात्रा ग्रुप ५-४ ले विजयी भयो ।
त्यसअघि निर्धारित समयको खेल १-१ को बराबरीमा सकिएको थियो । पहिलो हाफ गोलरहित बराबरीमा सकिएको खेलमा दुबै गोल दोस्रो हाफमा सम्भव भयो ।
दोस्रो हाफमा रोहित महतोले गोल गर्दै सिम्रेनीलाई खेलमा अग्रता दिलाए । एक गोलले पछि परेपछि यात्राले सिम्रेनीविरुद्ध लगातार आक्रमण गर्‍यो । सन्दिप गुरुङले यात्राका लागि बराबरी गोल फर्काए । बाँकी समयमा थप गोल हुन सकेन र खेल टाई ब्रेकरमा धकेलियो । जसमा यात्रा ग्रुपले बाजी मार्‍यो ।
विजेता यात्रा ग्रुपले २० हजार रुपैयाँसहित ट्रफी र प्रमाणपत्र प्राप्त गरेको छ । उपविजेतामा सीमित सिम्रेनीले दश हजार रुपैयाँमा चित्ता बुझायो ।
यात्रा ग्रुपका राजन थापा मगर प्रतियोगिताभरको सर्वोत्कृष्ट खेलाडी घोषित भए । यात्राकै सुरजप्रसाद शाह उत्कृष्ट गोलरक्षक र सन्दिप गुरुङ सर्वाधिक गोलकर्ता बने । नारायणी फुटबल क्लबको आयोजनामा सम्पन्न प्रतियोगितामा १६ टिम सहभागी थिए ।