इनार सफा गर्ने क्रममा निस्सासिएर दुई जनाको मृत्यु

चितवन / इनार सफा गर्ने क्रममा दुई युवकको मृत्यु भएको छ । चितवनको माडी नगरपालिका–७ देवेन्द्रपुरमा रिता रेग्मीको घरको भित्र प्यासेजमा रहेको इनार सफा गर्ने क्रममा अक्सिजन अभाव भई माडी ८ बस्ने ३० वर्षका शिव राई र २५ वर्षका सूर्य गुरुङको मृत्यु भएको हो ।
माडी–८ का गुरुङ इनार सफा गर्न इनारभित्र पसेकोमा केही समयपछि बोल्न नसकी हातले इशारा गरेपपछि सँगै काम गर्न गएका राई कम्मरमा डोरी बाँधेर उद्धार गर्न इनारभित्र पसेको थिए । राई डोरी चुडिएर खसेका थिए । अक्सिजन अभावका कारण दुवैको इनारभित्रै मृत्यु भएको जिल्ला प्रहरी कार्यालय चितवनले जनाएको छ ।
घटना स्थलमा इलाका प्रहरी कार्यालय माडी र प्रहरी चौकी कल्याणपुरबाट प्रहरी टोली उद्धारको लागि पुगेका थिए । मृतकहरुको शव पोस्टमार्टमको लागि भरतपुर अस्पताल लगिएको बताइएको छ ।