लामो समयसम्म खाडल नपुर्दा स्थानीय सास्ती भोग्न बाध्य

चितवन / कालिका नगरपालिकामा पदमपुर खानेपानी तथा सरसफाइ उपभोक्ता समितिका लागि पाइप विच्छ्याउन खनिएका खाल्डाखुल्डी नपुर्दा स्थानीयलाई समस्या भएको छ । लामो समयसम्म खाल्डाखुल्डी नपुरिएको भन्दै स्थानीयले आक्रोश पोखेका छन् ।
कालोपत्रे सडक समेत खनेर पाइप विच्छ्याइएको तर हालसम्म पनि अस्थायी रुपमा मात्रै पुर्ने काम भएको तर दीर्घकालीन मर्मत नभएको भन्दै खाल्डाखुल्डीले वर्षामा पानी जमेर हैरान हुने गरेको र घाम लाग्दा धुलो उडेकाले समस्या भएको स्थानीयको भनाइ छ ।
उपभोक्ता समितिका अध्यक्ष एवम् वडा अध्यक्ष समेत रहनुभएका लक्ष्मण पौडेलले भने ८÷९ वर्षदेखि काम गर्दै आएको र कन्स्ट्रक्सनकै क्रममा रहेको बताए । तर यो अन्तिम वर्ष भएको र पुरै सम्पन्न हुने उनको भनाइ छ ।
संघीय योजना अनुसार नगरपालिकाको वडानम्बर २,३,४ र ५ लाई खानेपानी पु¥याउने गरी काम भइरहेको उनले भने । साविक वडा नम्बर ३ र ४ मा पाइप विच्छ्याउने काम सकिएपछि सबै खाल्डाखुल्डी एकै पटक पुर्ने योजनामा रहेको उनले बताए ।
कुनै ठाउँमा बाँकी रहेपनि उपभोक्तालाई पानी खुवाएर छोड्ने दावी गरे । तर लामो समयसम्म पनि खाल्डाखुल्डी राम्रोसँग नपुरिदा स्थानीयले सास्ती खेपेका हुन् । अध्यक्षका अनुसार क्रसिङ गर्नुपर्दा खन्न बाध्य भएको र अहिले अस्थायी रुपमा खाल्डा पुरिएको छ ।
स्थानीयले खाल्डाखुल्डीको मर्मत नहुँदा दुर्घटनाको जोखिम समेत बढेको बताएका छन् । माटोले पुरिँदा चाँडै खाल्डा परेको र झन् समस्या भएको स्थानीयको भनाइ छ । वडाअध्यले भने खनिएको खाल्डाखुल्डी अस्थायी रुपमा पुरिएको र कतिपय ठाउँमा खानेपानीको मात्रै नभएर सिंचाईका लागि समेत खनिएको बताए ।
वडाले मात्रै नभएर सबै पक्ष सक्रिय भएर भएका समस्या समाधान गर्नतर्फ लाग्न आग्रह गर्दै काम नभएका ठाउँमा काम गर्न आफूले निर्देशन दिइसकेको वडाअध्यक्षले बताए ।