चितवनमा ‘लाखे’ को प्रिमियर शो हुने

चितवन / सस्पेन्स र थ्रीलरले भरिएको बहुप्रतिक्षित मल्टीस्टारर चलचित्र ‘लाखे’ को भदौ २९ गते प्रिमियर शो चितवनमा हुने भएको छ । भदौ ३१ गते देशभरका सिनेमा हलहरुमा प्रदर्शन हुने बहुप्रतिक्षित मल्टीस्टारर चलचित्र ‘लाखे’ लाई मोफसलको लक्की मिडिया हाउस चितवनको आयोजनामा हुँदैछ ।
नेपाली सिनेमा क्षेत्रका हरेक गतिविधिलाई प्राथमिकतामा राख्दै नयाँ तथा पुराना चलचित्रहरुको प्रचार–प्रसार र सिनेमा क्षेत्रको प्रवद्र्धनको लागि ‘लाखे’ को भव्य प्रिमियर शो हुन गइरहेको मिडिया हाउसले जनाएको छ ।
शो कार्यक्रममा नेपाली सिनेमा क्षेत्रका चर्चित कलाकारहरुको बाक्लो उपस्थिति हुने जनाइएको छ । प्रिमियर शोमा चलचित्र ‘लाखे’ का कलाकारसँगै अन्य राष्ट्रिय कलाकारहरुलाई पनि सम्मान गरिने मिडिया हाउसका महाप्रबन्धक हरि कार्की “लक्की“ले जानकारी दिए ।
सम्राट बस्नेतद्वारा निर्देशित चलचित्रमा सौगात मल्ल, अर्पण थापा, आर्यन अधिकारी, अनुपविक्रम शाही, वर्षा राउत, सुशील सिटौला, प्रशान्त ताम्राकार, रोहित रुम्बा, सन्जोग राणा, रक्षा बुढाथोकी, कालु राना र बाल कलाकार सिस्टम भण्डारीको अभिनय रहेको छ ।
गणेश मल्ल ठकुरी (जिएम) को प्रस्तुति रहेको चलचित्रको कथाकार र निर्माता सिजन अर्याल हुन् । हरि मल्ल ठकुरी कार्यकारी निर्माता रहेको चलचित्रमा सुसन प्रजापतिको छायांकन छ ।
ग्लोबल मिडिया एण्ड रिसर्च सेन्टर र औरियन प्रोडक्सनको ब्यानरमा निर्माण भएको चलचित्रको पटकथा, संवाद आकाश बरालले लेखेका हुन् । अर्जुन जिसीको सम्पादन रहेको चलचित्रका गीतमा दीपक बज्राचार्यको संगीत छ ।