भरतपुर २ मा महिलालाई निःशुल्क कम्प्युटर तालिम

नारायणगढ / भरतपुर महानगरपालिकाको वडा नं. २ ले वडाभित्रका २५ देखि ४५ वर्षभित्रका महिलाहरूलाई भाद्र १ गतेदेखि एक महिने निःशुल्क कम्प्युटर शिक्षा प्रदान गर्ने तयारी गरेको छ । महिलाहरूलाई कम्प्युटरसम्बन्धी ज्ञान दिलाउन सके त्यसबाट परिवारलाई ठूलो मद्दत पुग्ने हुँदा निःशुल्क कम्प्युटर तालिमको व्यवस्था मिलाउन लागेको वडाअध्यक्ष मनोज रानाभाटले जानकारी दिए ।
आधुनिक जमानामा प्रविधिले तीव्ररूपमा फड्को मारिसक्दा पनि प्रविधिसँग खेल्ने महिलाहरूको संख्या ज्यादै न्यून रहेको भन्दै वडाले महिला लक्षित कार्यक्रम गर्न लागेको उनले बताए ।
‘महिलाहरूलाई कम्प्युटरसम्बन्धी सामान्य जानकारी मात्रै गराउन सके पनि त्यो परिवार सहजरूपमा चल्न सक्ने हुँदा हाललाई सीमित महिलाहरूलाई निःशुल्क तालिमको व्यवस्था मिलाउन लागेका हौँ,’ उनले भने ।
१८ वटा टोल रहेको वडा नं. २ मा ए–सेट ट्रेनिङ एण्ड रिसर्च इन्स्टिच्युट प्रालिले महिलाहरूलाई तालिम दिने भएको छ । एक समूहमा १५ जनासम्म प्रशिक्षण दिलाउन सकिने ए–सेटका सञ्चालक लक्ष्मणप्रसाद भुसालले बताए ।