‘सम्पूर्ण’को वार्षिकोत्सवमा ओमकुमारीलाई साइकल

चितवन / भरतपुर १, बालकुमारी रोडस्थित सम्पूर्ण किताब नारायणगढले एक छात्रालाई साइकल प्रदान गरेको छ । सम्पूर्ण किताबले संस्था स्थापनाको पाँचौ वर्षको अवसर पारेर एक जना छात्रालाई बिहीबार साइकल प्रदान गरेको हो ।
संस्थाले राष्ट्रिय माध्यमिक विद्यालय बाह्रघरेमा कक्षा ९ मा अध्ययनरत ओमकुमारी थापामगरलाई एक थान साइकलसहित शैक्षिक तथा सरसफाइका सामग्री सहयोग गरेको हो ।
सञ्चालक शिरिषा सापकोटाका अनुसार यसअघि संस्थाले प्रत्येक वर्ष भदौ २३ गते सामुदायिक विद्यालयका विपन्न एवम् जेहेन्दार विद्यार्थीलाई सहयोग गरेर वार्षिकोत्सव मनाउँदै आएको छ ।
कार्यक्रममा अग्रज साहित्यकार गोविन्दराज विनोदी, विद्यालयका प्रधानाध्यापक ऋषिराम खरेललगायतको उपस्थिति रहेको थियो । सम्पूर्ण किताबले विगत पाँच वर्षदेखि साहित्यसँग सम्बन्धित पुस्तकको बिक्री वितरण गर्दै आएको छ ।