इसुजु चितवन गोल्डकप : जागृति युवा क्लबद्वारा मकवानपुर ११ पराजित

चितवन / क्याम्पाचौरमा जारी इसुजु चितवन गोल्डकप अन्तर्राष्ट्रिय आमन्त्रण फुटबलमा नव जन जागृति युवा क्लब सिमरा विजयी भएको छ । आइतबार सम्पन्न खेलमा जागृति क्लबले मकवानपुर ११ लाई ३–१ गोलअन्तरले पराजित गरेको हो ।
उक्त खेलमा सिमराका विवेक चौधरीले दुई गोल गरेका हुन् भने अर्को एक गोल सृजन गौतमले गरेका थिए । यस्तै मकवानपुरका सुजन गुरुङले एक गोल फर्काए ।
खेलको १७ औं मिनेटमा विवेकको गोलबाट सिमराले अग्रता लियो । २४ औं मिनेटमा विवेकले व्यक्तिगत दोस्रो गोल गर्दै सिमरालाई दोहोरो अग्रता दिलाए ।
पहिलो हाफमा मकवानपुरमाथि सिमरा हाबी भयो । मकवानपुरले पहिलो हाफको तुलनामा दोस्रो हाफमा सुधारिएको प्रदर्शन ग¥यो । ४७ औं मिनेटमा सुजनले गोल गर्दै मकवानपुरलाई खेलमा फर्काउने संकेत गरे ।
दोस्रो हाफमा मकवानपुरले थप केही अवसर सृजना गरे पनि सदुपयोग गर्न सकेन । ७० औं मिनेटमा सृजनले गोल गर्दै सिमराको जित सुनिश्चित गरे । दुई गोल गर्ने सिमराका विवेक म्यान अफ दि म्याच चुनिए । उनले नगद १० हजार रुपैयाँ प्राप्त गरे । गोल्डकपमा सोमबार मनाङ एफसी र बागमती नगरपालिका सर्लाही भिड्नेछन् ।
खेल दिउँसो ४ बजे हुनेछ । भरतपुर फुटबल क्लबको आयोजनामा जारी गोल्डकप विजेताले सात लाख रुपैयाँ प्राप्त गर्नेछ भने उपविजेताले तीन लाख ५० हजार प्राप्त गर्नेछ ।