सामुदायिक वनबाट ४८ क्यूफिट सालको काठ बरामद

चितवन / डिभिजन वन कार्यालय चितवनले भरतपुर महानगरपालिका वडा नम्वर १ आँपटारीस्थित जलदेवी सामुदायिक वनबाट सालको काठ बरामद गरेको छ । वन कार्यालयले सामुदायिक वनले लुकाएर राखेको ४८ क्यूफिट सालको चिरान काठ शुक्रवार बरामद गरेको हो ।
जलदेवी सामुदायिक वनले विगत केही वर्षयता पर्यापर्यटन कार्यक्रम अन्तरगत जिपलाइन सञ्चालन गर्दै आएको छ । जिपलाइनको टिकट काउण्टरमा सालको काठ राखिएको सूचनाका आधारमा चेक गर्दा ४८ क्यूफिट चिरान काठ बरामद भएको डिभिजन वन कार्यालय चितवनका सूचना अधिकारी बालकृष्ण खनालले बताए ।
अनुसन्धानकै क्रममा रहेकाले अहिले नै काठ अवैध हो भन्न नसकिने खनालको भनाइ छ । जलदेवी सामुदायिक वनले भने पर्यापर्यटनको विकासका लागि समितिबाट निर्णय गरेर सालको काठ राखिएको दाबी गरेको छ ।