चितवन / चितवनका विभिन्न स्थानमा तमू समुदायले ‘तमू ल्होसार’ पर्व भव्यताका साथ मनाएका छन् । गुरूङ जातिको बसोबास रहेका ठाउँमा धुमधामका साथ ल्होसार पर्व मनाइएको हो ।
विशेष गरी तमू ह्युल छोँज धीँ गुरूङ राष्ट्रिय परिसद् चितवनले महाबौद्ध गुम्बा तीनखोलेमा विशेष कार्यक्रम गरेर ल्होसार मनाएको हो । विगतका वर्षमा भन्दा यसवर्ष विशेष कार्यक्रम आयोजना गरेर ल्होसार मनाएको तमू ह्युल छोँज धीँ चितवनकी अध्यक्ष विमलादेवी गुरूङले जानकारी दिइन् ।
विविध सांस्कृतिक कार्यक्रम गरेर भव्य कार्यक्रम गरिएको उनले बताइन् । तमू विद्यार्थी छोँज धीँ चितवनको संयोजकत्वमा सम्पन्न सांस्कृतिक कार्यक्रममा विद्यार्थीहरूले विभिन्न गीतमा नृत्य प्रस्तुत गरेका थिए ।
- ADVERTISEMENT -
यसवर्ष तमू समुदायले बाघ वर्ग (तोल्हो)लाई बिदाइ गर्दै बिरालो वर्ग (हिल्हो)लाई स्वागत गरेर ल्होसार मनाएको हो । १२ वटा जीवजन्तुको ल्होकोरको आधारमा यसवर्ष बिरालो वर्गलाई स्वागत गरिएको हो । तमू समुदाय रहेका विभिन्न टोल तथा समाजमा विशेष कार्यक्रम अयोजना गरेर ल्होसार मनाइएको छ । तमू प्ये ल्हु संघले पनि विभिन्न इकाइहरूमा कार्यक्रम गरेर ल्होसार मनाएको छ ।
