खैरहनीको दुई वटा पसलमा आगजनी, लाखौको क्षति

चितवन / खैरहनीस्थित पर्सा बजारको दुईवटा पसलमा आगलागी भएको छ । खैरहनी नगरपालिका वडा नम्बर ८ चौविसकोठी चोकमै रहेको ॐ अनुस्का ज्वेलर्स र चाँदनी फेन्सी पसलमा आज (बुधबार) बिहान आगलागी भएको जिल्ला प्रहरी कार्यालय चितवनले जनाएको छ ।
प्रहरीका अनुसार ज्वेलर्सबाट सुरु भएको आगलागीले फेन्सी पसलमा समेत क्षति पुगेको हो । प्रारम्भिक अनुसन्धानमा विद्युत सर्ट भएर आगलागी भएको देखिएको प्रहरीले जनाएको छ । बिहान करिब पौने ४ बजे भएको आगलागी दमकल, प्रहरी र स्थानीयको सहयोगमा आधा घण्टामा नियन्त्रणमा लिइएको प्रहरीले जनाएको छ ।
आगलागीबाट ज्वेलर्समा मात्रै करिब २७ लाखको क्षति भएको ॐ अनुस्का ज्वेलर्सका संचालक विशाल गोतामेले बताए । गोतामेका अनुसार आगलागीबाट ज्वेलर्समा भएको चाँदीको गहना, स्वकेश, र्र्याक, सिसि क्यामरा तथा डेकोरेशनको सामान पूर्णरुपमा नष्ट भएको छ । ज्वेलर्ससँगै जोडिएको फेन्सी पसलमा समेत आगलागीबाट क्षति भएको छ ।