चितवनको कालिकामा भोलिदेखि खुल्ला नकआउट फुटबल प्रतियोगिता

चितवन / कालिका नगरपालिकाको गैरीबारी खेलमैदानमा सहिद हिरादेवी थापा मगर (क. निमा) स्मृति द्वितीय खुल्ला नकआउट फुटबल प्रतियोगिता हुने भएको छ । अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) कालिका नगर समिति चितवनको आयोजनामा भोलि (बुधबार) देखि द्वितीय खुल्ला नकआउट फुटबल प्रतियोगिता हुने भएको हो ।
प्रतियोगितामा चितवन र छिमेकी जिल्लाबाट १५ वटा टिमको सहभागिता रहने समितिका अध्यक्ष सिद्धान्त मगरले जानकारी दिए । प्रतियोगितामा चितवन र छिमेकी जिल्लाबाट १५ टोली सहभागी हुनेछन् । सहभागी टोलीलाई दुई समूहमा विभाजन गरिएको छ ।
अध्यक्ष मगरका अनुसार प्रतियोगितामा प्रथम हुनेले १ लाख प्राप्त गर्ने छन् भने द्वितीय हुने ५० हजार पाउने छन् । यस्तै विधागत उत्कृष्ट खेलाडीहरु (उत्कृष्ट गोलरक्षक, उत्कृष्ट रक्षक र उत्कृष्ट गोलकर्ता) लाई पनि पुरस्कारको व्यवस्था गरिएको उनले बताए । उनीहरुलाई आकर्षक जुत्ता मेडल र प्रमाणपत्र दिइने छ ।
बागमती प्रदेशका पूर्वमन्त्री एवम् नेकपा माओवादी केन्द्रका केन्द्रीय सदस्य घनश्याम दाहाल (अविनास) ले उद्घाटन गर्ने अध्यक्ष मगरले जानकारी दिए । प्रतियोगिताको कुल खर्च चार लाख पचास लाग्ने अनुमान आयोजक गरेको छ भने माघ १९ गतेसम्म खेल संचालन हुनेछ ।
प्रतियोगिताको उद्घाटन खेलमा निमा र आयाम युवा समाज भिड्नेछन् । खेल दिउँसो २ बजेबाट सुरु हुनेछ ।