सेन्ट्रल बोर्डिङका करिब ३ सय विद्यार्थीको निःशुल्क स्वास्थ्य परीक्षण

नारायणगढ / भरतपुर वडा नं. ३ स्थित सेन्ट्रल इङ्ग्लिस बोर्डिङ स्कुलका करिब ३०० जना विद्यार्थीको निःशुल्क स्वास्थ्य परीक्षण गरिएको छ । लायन्स क्लब अफ भरतपुर फ्रेण्ड्सको आयोजनामा उनीहरुको निःशुल्क स्वास्थ्य परीक्षण गरिएको स्कुलका प्रिन्सिपल राजेश शर्माले जानकारी दिए ।
प्रिन्सिपल शर्माका अनुसार भरतपुरस्थित आशा अस्पतालको सहयोगमा बुधबार बोर्डिङका विद्यार्थीको निःशुल्क स्वास्थ्य परीक्षण गराएको हो । उक्त स्वास्थ्य परीक्षणबाट करिब तीन सय विद्यार्थीले सेवा प्राप्त गरे ।
उनले विद्यार्थीको स्वास्थ्यमा ध्यान दिँदै विद्यालयमा कार्यक्रम आयोजना गरेर ठूलो गुन लगाएको भन्दै आयोजक क्लबलाई धन्यवाद व्यक्त गरे । ‘क्लबले विद्यार्थीको स्वास्थ्य परीक्षण गरेर अभिाभवकत्व दर्शाएको छ,’ उनले भने, ‘यसले विद्यालय र क्लबबीचको निकटता थप बढाएको छ ।’
क्लबको वार्षिक कार्यतालिकाअनुसार विद्यार्थीको स्वास्थ्य परीक्षण गराएको क्लबका अध्यक्ष सुमन श्रेष्ठले बताए । विद्यार्थीहरूमा समयसमयमा स्वास्थ्य परीक्षण गराइराख्नुपर्छ भन्ने सन्देश दिन पनि क्लबले विद्यालयमा कार्यक्रम गरेको उनको भनाइ छ । क्लबका भाइस डिस्ट्रिक्ट गभर्नर दिनानाथ न्यौपानेले बेलाबेलामा बालबालिकाको स्वास्थ्य परीक्षण गर्नु÷गराउनुले विद्यार्थी र विद्यालय दुवैलाई फाइदा पुग्ने धारणा राखे ।
विद्यालयमा अध्ययनरत करिब सात सय विद्यार्थीमध्ये प्ले ग्रुपदेखि कक्षा पाँचसम्मका करिब ३०० जना विद्यार्थीको स्वास्थ्य परीक्षण गरिएको विद्यलायका भाइस प्रिन्सिपल विष्णुबहादुर बस्नेत क्षेत्रीले जानकारी दिए ।