आठ वर्षपछि नेपाल तामाङ घेदुङ चितवनको अधिवेशन हुँदै

चितवन / तामाङ समुदायको छाता संगठन नेपाल तामाङ घेदुङ जिल्ला शाखा चितवनले भोलि (फागुन २७ गते शनिबार) पाँचौ अधिवेशन गर्ने भएको छ । अधिवेशनका लागि सम्पूर्ण तयारी पूरा भएको घेदुङ जिल्ला शाखाका कार्यवाहक अध्यक्ष मैतसिंह घिसिङले जानकारी दिए ।
कार्यवाहक अध्यक्ष घिसिङका अनुसार घेदुङको अधिवेशन जिल्ला समन्वय समिति चितवनको हलमा हुनेछ । अधिवेशनका लागि घेदुङ वडा समिति, घेदुङ नगर समितिलगायत तामाङ बुद्धिजीवीहरु सबैलाई पत्राचार गरी सकिएको बताए ।
नेपाल तामाङ घेदुङ केन्द्र (संघीय) को परिपत्र अनुसार चैत मसान्तभित्र देशैभरिका जिल्ला शाखाले अधिवेशन गरी सक्नु पर्नेछ । यसअघि २०७१ सालमा घेदुङ चितवनको चौथो अधिवेशन सम्पन्न भएको थियो । जिल्ला शाखाको अधिवेशन प्रत्येक पाँच वर्षमा हुने भनिए पनि आठ वर्षपछि पूर्णता पाउँदैछ ।
२०७६ साल पुस २५ र २६ गते बागमती प्रदेशको उपाध्यक्ष पदमा जिल्लाका तत्कालीन अध्यक्ष गोपीलाल घलान निर्वाचित भएपछि सो पद रिक्त रहेको थियो । घिसिङका अनुसार तत्कालीन अध्यक्ष घलानले राजीनामा नदिएकै कारण करिब दुई वर्ष ३ महिना अध्यक्ष पद रिक्त हुन पुगेको हो ।
२०७८ साल चैतको ५ गते आधिकारिक रुपमा कार्यवाहक अध्यक्षको जिम्मेवारी पाएको उनले बताए । पाँचौ अधिवेशनसम्म आइपुग्दा घिसिङले करिब ११ महिनाको मात्रै पदीय जिम्मेवारी पाएको हो ।
संस्थागत नियम अनुसार एकै व्यक्तिले दुई ठाउँमा पद ओगट्न नमिल्ने र जिल्लाबाट प्रदेशमा निर्वाचित भएको तेस्रो दिनमा राजीनामा दिनु पर्ने उनको भनाइ छ । व्यक्तिगत पदको लोलुपताकै कारण संस्थालाई क्षति पुगेको उनको बुझाई छ ।