सिन्धुली बस दुर्घटनामा ३ महिलासहित ५ जनाको मृत्यु

सिन्धुली / यात्रुबाहक बस दुर्घटनामा पाँच जनाको मृत्यु भएको छ । सिन्धुलीको फिक्कल गाउँपालिकामा भएको उक्त बस दुर्घटनामा पाँच जनाको मृत्यु भएको हो ।
फिक्कल गाउँपालिकाकी अध्यक्ष पार्वती सुनारले फिक्कल गाउँपालिका–४ कुइभिरमा बस दुर्घटना हुँदा दुई पुरुष र तीन महिलाको मृत्यु भएको जानकारी दिइन् । अध्यक्ष सुनारका अनुसार ओखलढुंगाबाट काठमाडौं आउँदै गरेको बा २ ख ६५९६ नम्बरको बस दुर्घटना परेको हो ।
अहिले पनि उद्धार कार्य चलिरहेको जानकारी दिएकी उनले २५ जना घाइतेको उद्धार गरेर घुर्मी र खुर्काेटसहितका अस्पतालमा उपचारका लागि पठाइएको बताइन् ।
‘ओखलढुंगाबाट आएको बस रहेछ । ओरालो ठाउँमा भएकाले ब्रेक नलागेको हुन सक्ने अहिले अनुमान गरिएको छ,’ उनले भनिन्, ‘केही शव हुन सक्ने आशंका गरिएको छ । अहिले पनि उद्धार कार्य चलिरहेको छ ।’