तीन संस्थाको संयुक्त आयोजनामा ६६ जनाको रक्तदान

चितवन । उद्योग वाणिज्य संघ चितवन, रोटरी क्लब अफ नारायणगढ र स्पोइसिस क्लब अफ आरसी नारायणगढको संयुक्त आयोजनामा रक्तदान कार्यक्रम सम्पन्न भएको छ । रक्तदान कार्यक्रम उद्योग वाणिज्य संघ चितवनको परिसरमा शनिबार सम्पन्न भएको हो ।
रक्तदान कार्यक्रममा १६ महिलासहित ६६ जनाले रक्तदान गरेको रोटरी क्लब अफ नारायणगढका पूर्वअध्यक्ष अनुकूल श्रेष्ठले जानकारी दिए । जिल्लामा रगत अभाव भइरहेको अवस्थामा तीन वटै संस्थाले सामाजिक उत्तरदायित्व बहन गर्दै रक्तदान कार्यक्रम गरेको श्रेष्ठले बताए ।
कार्यक्रममा उद्योग वाणिज्य संघ चितवनका अध्यक्ष चुननारायण श्रेष्ठले हरेक तीन महिनामा प्रत्येक मानिसले रगत दिन सक्ने हुँदा सबैलाई रक्तदान कार्यक्रममा सहभागी हुन आग्रह गरे । रगत नपाएर विरामीको ज्यान सक्ने भएकाले रक्तदान गरी मानवीय कार्यमा सहभागी हुनुपर्नेमा उनको जोड थियो । पछिल्लो समय रक्तदान कार्यक्रम नहुँदा चितवनमा रगतको अभाव हुँदै गएको पाइएको छ ।
कार्यक्रममा उद्योग वाणिज्य संघ चितवनका अध्यक्ष चुननारायण श्रेष्ठ, रोटरी क्लब अफ नारायणगढका भोला लामिछाने, स्पोइसिस क्लब अफ आरसी नारायणगढका अध्यक्ष पूर्णिमा श्रेष्ठलगायत तीन वटै संस्थाका सदस्यहरुको सहभागिता रहेको थियो ।