मृगौला पिडितलाई उपचारका लागि सहयोगको अपिल

चितवन / कालिका नगरपालिका वडा नं. ६ निवासी राजन शर्माको दुबै मृगौलाले काम गर्न छोडेपछि उपचारमा सहयोगका लागि अपिल गरेका छन् । १८ वर्षीय शर्मा नारायणी पव्लिक स्कूल भरतपुरको कक्षा १२ मा अध्ययनरत विद्यार्थी हुन् ।
२०८० जेठ १ गते चितवनमा परिक्षणको क्रममा छोरोका दुबै मृगौलाले काम गर्न छोडेको थाहा भएको विरामीको आमा लक्ष्मी शर्माले जानकारी दिइन् । आर्थिक श्रोत जुटाउन बिक्री गर्ने जग्गा जमिन नभएको बताउँदै उनले टिनको टहरो बाहेक आफुसँग केही नभएकोले छोराको उपचारको लागि सहयोग जुटाउन अपिल गरेको बताइन् ।
आर्थिक अभावका कारण छाक टार्न समस्या परिरहेको समयमा छोराको उपचारको लागि परोपकारी दाताहरुसँग सहयोग माग्नुको विकल्प नभएको उनको भनाइ छ । श्रीमान भारतमा समान्य रोजगारीमा भएपनि आफूले गाउँघरमै ज्याला मजदुरी गरेर घर चलाउदै आएको उनले बताइन् ।
छोराको मृगौला प्रत्यारोपण गरी पुर्नजीवन दिनको लागि कसैले गरेको सहयोग आफूहरुलाई जीवनदान सरह हुने बताउदै उनले सबैसंग सहयोगको अपिल गरेकी छिन् । मृगौलाको प्रत्यारोपण गर्दा ठूलो धनराशी खर्च हुने भएकाले परिवारले उपचार खर्च जुटाउन नसकेपछि सहयोगको याचना गरेको हो ।
आर्थिक अवस्था अत्यन्त कमजोर भएका उनको मृगौलाले काम गर्न छोडेको पत्ता लगाउनमै धेरै खर्च भएको परिवारले जनाएको छ । डायलसिस भन्दा पनि समयमै मृगौला प्रत्यारोपण गर्न चिकित्सकले सुझाव दिएका छन् । जसका कारण पीडित परिवार मृगौला प्रत्यारोपणको तयारीमा जुटेको छ । तर खर्चको अभावमा मृगौला प्रत्यारोपण गर्न खर्चकै कारण समस्या भएको परिवारले बताएको छ ।
उपचारमा सहयोग गर्नका लागि मुक्तीनाथ विकास बैंक मा लक्ष्मी शर्माको नाममा रहेको खाता नम्वर ११०२१६००४४९५०६०००००१ रहेको छ । थप सम्पर्क गर्नुपरे विरामीको आमा लक्ष्मी शर्मा ९८४५३२६०६२ र विरामीको ठुलो वुवा प्रेम शर्मा ९८४५४४५७१४ नं. मा गर्न सकिने छ ।