पपुलर सैलुनद्वारा ३० जनालाई निःशुल्क कपाल काट्ने तालिम

चितवन / पपुलर युनिसेक्स सैलुनले ६ महिलासहित ३० जनालाई निःशुल्क कपाल काट्ने तालिम दिने भएको छ । विदेशमा श्रम बेचेर स्वदेश फर्किएका सैलुनका संचालक सुलभ सिग्देलले आफूझैँ विदेशिनु नपरोस् भन्नका उनीहरुलाई तालिम दिन लागेका हुन् । भरतपुरस्थित सिजी ल्यान्डमार्कमा रहेको सैलुनले युवायुवतीहरुलाई स्वरोजगार बनाउन तालिम दिन दिन लागिएको संचालक सिग्देलले जानकारी दिए ।
तालिमको बिहीबार उद्योग वाणिज्य सङ्घ चितवनका अध्यक्ष चुननारायण श्रेष्ठले उद्घाटन गरेका हुन् । तालिम उद्घाटन समारोहमा श्रेष्ठले आफूले रकम बचाएर निःशुल्क तालिम गरेकोमा सिग्देललाई बधाई दिँदै सहभागीलाई तालिमपछि स्वदेशमै स्वरोजगार बन्न सुझाव दिए ।
कार्यक्रममा नेपाल पत्रकार महासङ्घ चितवनका अध्यक्ष नारायण अधिकारी, कृषि तथा वन विज्ञान विश्वविद्यालयका डा निराजन भट्टराईलगायतले आ–आफ्नो धारणा राखेका थिए । विदेशबाट फर्किएर सैलुन सञ्चालन गर्दै आउनुभएका सिग्देलले आफ्नो निजी खर्चबाट तालिम दिन लागेका हुन् ।
उहाँका अनुसार तालिमका लागि ८३ जनाले दरखास्त दिएकामा उनीहरूबाट ३० जना छनोट गरिएको हो । तीमध्ये छ महिला छन् । पैतालीस दिनसम्म उहाँहरूलाई दाह्री र कपाल काट्ने तालिम दिइने छ । यससँगै उहाँहरूले आफैँले सैलुन सञ्चालन गर्न सक्ने उनले बताए । यसबाहेक अन्य समय शुल्क लिएर तालिम दिँदै सिग्देलले एक जनाको रु २० हजार लिने गरेका छन् ।
सिग्देलले आफूले सैलुन सुरु गरेको १०औँ वर्षको अवसरमा जिल्लाका ग्रामीण क्षेत्रका विद्यालयका विद्यार्थीको निःशुल्क कपाल काट्दै आएका छन् । हरेक हप्ताको शुक्रबार सैलुनका कर्मचारीले विद्यालयमै पुगेर विद्यार्थीको कपाल काट्ने र स्वस्थ रहन सुझाव दिने गरेका छन् । गएको शुक्रबार सातौँ हप्ता कपाल काटेको उनले बताए । हरेक हप्ता ४५ देखि ६० जनाको कपाल उनको समूहले काट्दै आएको छ ।