चितवन / भरतपुर महानगरपालिका वडा नं. २ क्षेत्रपुरस्थित सिद्धि विनायक बचत तथा ऋण सहकारी संस्था लि. ले महिला शेयर सदस्यहरुलाई लक्षित गरी तिज कार्यक्रम गरेको छ । हिन्दू नारीहरुको पर्व तिजको संस्कृति एवम् परम्परा जगेर्ना गर्ने उद्देश्यका साथ बिहीबार भरतपुरको मलेवा पार्टी प्यालेसमा तिज विशेष शुभकामना आदानप्रदान कार्यक्रम गरी मनाएको हो ।
कार्यक्रममा तिज पर्वको महत्व सँगसँगै महिला शेयर सदस्यहरुलाई संस्थागत अवस्थाको जानकारी गराइएको थियो । कार्यक्रममा चितवन जिल्ला बचत तथा ऋण सहकारी संघ लि.का अध्यक्ष विद्या कोइरालाको प्रमुख आतिथ्यता रहेको थियो ।
कार्यक्रममा सिद्धि विनायक बचत तथा ऋण सहकारी संस्था लि.का अध्यक्ष थिरप्रसाद धिताल, संस्थापक अध्यक्ष शालिकराम घिमिरे, निवर्तमान अध्यक्ष पुरुषोत्तम गौतम, भरतपुर महानगरपालिका वडा नं. २ का वडासदस्य बेलपत्र मास्केलगायतको उपस्थिति रहेको थियो ।
सिद्धि विनायक बचत तथा ऋण सहकारी संस्था लि.का उपाध्यक्ष भगवती पाण्डेको संयोजकत्वमा तिज विशेष शुभकामना कार्यक्रम सम्पन्न भएको थियो । तिज कार्यक्रममा संस्थाका अढाइ सय बढी महिला शेयर सदस्यहरुको बाक्लो उपस्थिति रहेको थियो ।
पछिल्लो समय तिज पर्व एक महिना अघिदेखि नै विभिन्न संघ संस्था, टोल विकास संस्था लगायतले आयोजना गर्ने गरेको पाइन्छ । स्थानीय प्रशासनले भने तिजलाई भड्किलो रुपमा नमनाउन र भिडभाडरहित ढंगले मनाउन आग्रह गर्दै आएको छ ।
