–बबिलाल तामाङ
खोलेसिमल । तामाङ समुदायहरु एकै ठाउँमा रहे जस्तोसुकै लडाइँ पनि जित्न सकिने नेपाल तामाङ घेदुङ बागमती प्रदेशका अध्यक्ष लिलाकुमार घलानले बताएका छन् । नेपाल तामाङ घेदुङ कालिका नगर समिति चितवनको दोस्रो साधारण सभा तथा प्रथम अधिवेशनमा अध्यक्ष घलानले सो बताएका हुन् ।
तामाङको हक अधिकारका लागि राज्यको निकायमा हाम्रो सहभागिता अनिवार्य हुनु पर्ने अध्यक्ष घलानको भनाइ थियो । राज्यसत्तामा सहभागिता न्यून भएका कारण हक अधिकारबाट बन्चित हुनु परेको दुखेसो व्यक्त गरे ।
- ADVERTISEMENT -
कार्यक्रममा बोल्दै उनले राज्यले एक भाषा, एक धर्म र एक संस्कृतिको नीति लादेपछि तामाङ समुदाय सबै अधिकारबाट बञ्चित भएको बताए । नेपाल एकीकरणको नाममा तामाङहरुको भाषा, संस्कृति र पहिचान निमिट्यान्न पारेको उनको भनाइ थियो ।
उनले अढाइ वर्षसम्म भएको यो प्रहारबाट तामाङहरु राज्यको मूलधारमा कहिले आउन नसकेको जिकिर गरे । ‘राज्यसत्तामा तामाङको भूमिका कति छ भन्ने कुराले ठूलो महत्व राख्छ’ उनले भने, ‘राज्यसत्तामा हाम्रो मान्छे भएमा हक अधिकार तथा नीति निर्माणमा पहुँच पुग्ने छ ।’ सबैलाई आजैबाट हातेमालो गर्दै एक ढिक्का भई अघि बढ्न उनले आग्रह समेत गरे ।
- ADVERTISEMENT -
पछिल्लो समय तामाङ भाषा लोप हुँदै गएकाले स्थानीय निकाय र वडा कार्यालयलाई ध्यानाकर्षण गराउँदै नेपाल तामाङ घेदुङका जिल्ला, नगर तथा वडालाई भाषा संरक्षणमा लाग्न उनको जोड दिए ।
कार्यक्रममा कालिका नगरपालिकाका उपमेयर विमला तामाङ, नेपाल तामाङ घेदुङका केन्द्रीय सदस्य सुभाष लामा, नेपाल तामाङ घेदुङ जिल्ला समन्वय समिति चितवनका बाबुलाल थिङ, सचिव सन्देश घलान, सदस्य अशोक तामाङ, कालिका नगरपालिका वडाध्यक्षहरु सन्तविर स्याङतान, वीरेन्द्र तामाङ, कमल मोक्तान, जीवन लामालगायतले मन्तव्य दिएका थिए ।
कार्यक्रम नेपाल तामाङ घेदुङ कालिका नगर समितिका अध्यक्ष धन लामाको अध्यक्षतामा सम्पन्न भएको थियो भने सचिव तोमबहादुर तामाङले संचालन गरेका थिए ।
