चितवन / विकाशानन्द फाउन्डेसन विश्व परिवार चितवन शाखाको आयोजनामा ‘गाभा ध्यान शिविर’ हुने भएको छ । फाउन्डेसनका अध्यक्ष निर्मला पौडेल कुमालले मंगलबार पत्रकार सम्मेलत मार्फत ‘गाभा ध्यान शिविर’ हुन गइरहेको जानकारी दिइन् ।
उनका अनुसार यही मङ्सिर १० गते मनोक्रान्ति अभियानका प्रवक्ता एवम् दार्शनिक डा. योगी विकाशानन्दको उपस्थितिमा एकदिने योग, ध्यान तथा ज्ञान शिविर हुन लागेको हो ।
मानिसहरुलाई योग, ध्यान र ज्ञानमार्फत जीवन रुपान्तरणका लागि कार्यक्रम आयोजना गर्न लागेको उनले बताइन् । योग तथा ध्यान शिविर भरतपुर–११ स्थित धावन पार्टी प्यालेसमा दिउँसो १ बजेदेखि साँझ ५ बजेसम्म हुने आयोजकले जनाएको छ ।
युवाहरुलाई योग तथा ध्यान शिविरबारे जानकारी गराउन पनि कार्यक्रम आयोजना गरिएको कार्यक्रम संयोजक विमल सापकोटाले जानकारी दिए । ‘हामीले कम्तीमा युवाशक्तिलाई पनि योग तथा ध्यान शिविरमा सहभागी गराउन सकियो भने जीवन परिवर्तन सहज हुन्छ’, उनले भने, ‘त्यसैले यो कार्यक्रममा युवालाई पनि समेट्ने प्रयास रहन्छ ।’
पछिल्लो समय अनावश्यक तनावका कारण युवाहरुमा विभिन्न खालका मानसिक समस्या बढ्दै गएको हुँदा मनोक्रान्तिमार्फत त्यस्ता समस्या समाधान गर्न सकिने उनको भनाइ छ ।
कार्यक्रममा करिब दुई हजार जनाको सहभागिता रहने साधक उमङ्ग आनन्दले जानकारी दिए । योग र ध्यानमार्फत मानसिक एवम् शारीरिक परिवर्तन सम्भव हुने हुँदा इच्छुक सबैलाई कार्यक्रममा उपस्थित भइदिन पनि सार्वजनिक आह्वान गरिएको छ ।
डा. योगी विकाशानन्दसहित सात जनाको समूहमार्फत हुने कार्यक्रममा सामान्य श्वासप्रस्वासबाट योग तथा ध्यान सुरू हुनेछ । आन्तरिक स्रोत जुटाएर कार्यक्रम सम्पन्न गर्न लागेको उनको भनाइ छ ।
