तामाङ महोत्सवमा आज ज्योति मगर आउने, एकैदिन आठ हजार बढी दर्शकको अवलोकन

चितवन / राप्तीमा जारी ‘प्रथम राप्ती सोनाम ल्होछार साँस्कृतिक उत्सव २०८० महोत्सव’ मा आठ हजार बढी दर्शकले अवलोकन गरेका छन् । श्री च्योमदेन दे ढा च्योम गुम्बाका अध्यक्ष तथा कार्यक्रम संयोजक देवराजले लामाले बिहीबार उक्त संख्यामा दर्शकको सहभागिता रहेको जानकारी गराएका हुन् ।
अध्यक्ष लामाले आज (शुक्रबार) राष्ट्रिय रुपमा ख्याति कमाएका ज्योति मगरको प्रस्तुति रहने न्यूजप्रवाह डकटमलाई बताए । ज्योति सँगसँगै हल्के हल्दारको टिम, राष्ट्रिय हास्य कलाकारहरु, स्थानीयस्तरका रत्ननगर कला केन्द्र, पर्सा डान्स सेन्टर र स्थानीय कलाकारहरुले प्रस्तुति दिने उनले जानकारी दिए ।
चितवनमै पहिलो पटक सुरु गरिएको तामाङ महोत्सवमा दर्शकको उत्साहपूर्ण सहभागिताले सफल भएको उनको भनाइ छ । उनका अनुसार महोत्सवका प्रत्येक व्यापारिक स्टलहरुले राम्रो व्यापार भएको छ । महोत्सवमा राखिएका केही स्टलहरुले यसअघि रत्ननगरको चित्रसारी फुड फेस्टिबलमा ठूलो घाटा व्यहोर्नु परेको थियो ।
महोत्सव समापन दुई दिन बाँकी हुँदै महोत्सव सफल भएको उनले दावी समेत गरेका छन् । चितवनकै पहिलो यो तामाङ महोत्सवले सम्पूर्ण तामाङ समुदायलाई निकै उत्साहित बनाएको पाइएको छ । आगामी दिनमा यस महोत्सवलाई तिथि नै बसालेर अघि बढ्नु पर्ने अध्यक्ष लामाको भनाइ छ ।