ल्होछार महोत्सवमा आज ‘द एक्स ब्याण्ड’को प्रस्तुति

चितवन / तामाङ समुदायको गौरव र गरिमा बोकेको ‘प्रथम राप्ती सोनाम ल्होछार सांस्कृतिक उत्सव–२०८० महोत्सव’को समापन हुँदैछ । जिल्लामै पहिलो पटक माघ २४ गतेदेखि सुरु भएको महोत्सवको आज (शनिबार) समापन हुने भएको हो ।
महोत्सवमा आज युवाहरुको ढुकढुकी राष्ट्रिय कलाकार सेलो गायक आस्मान लोप्चन, अन्जु तामाङ सँगसँगै नेपालकै प्रसिद्ध पुरानो ब्याण्ड ‘द एक्स ब्याण्ड’ को बेजोड प्रस्तुति रहने कार्यक्रम संयोजक देवराज लामाले जानकारी दिए ।
संयोजक लामाले दर्शकहरुको उत्साहजनक सहभागिताले महोत्सव सफल भएको दावी गरेका छन् । जिल्लामै पहिलो पटक राप्तीका तामाङ समुदायबाट सुरु गरिएको महोत्सवलाई स्थानीय लगायत देश विदेशबाट आर्थिक जुटेको उनले बताए ।
श्री च्योमदेन दे ढा च्योम गुम्बाका सल्लाहकार तथा राप्तीका उपमेयर देवेन्द्र लामाले यसअघि तामाङ पत्रकारसँग प्रेस सम्मेलन गर्दै महोत्सव संचालन पूर्व नै सफल भएको घोषणा गरेका थिए । उपमेयर लामाले आगामी वर्ष अझ बढी परिस्कृत गर्दै समयावधि पनि बढाउने बताएका छन् ।
महोत्सवमा जिल्लाभरिकै तामाङ समुदायहरुको सहभागिता रहेको आयोजकले जनाएको छ । राप्तीका तामाङ समुदायबाट सुरु भएको उक्त महोत्सव ऐतिहासिक बनेको स्थानीयहरुको भनाइ छ ।