चितवन / मृगकुञ्ज मध्यवर्ती उपभोक्ता समिति बछौली र सपना भिलेज सोसियल इम्प्याक्टले संयुक्त रुपमा आयोजना गरेको ४५ दिने वारिस्ता, हस्पिटालिटी तथा कफी मेसिन मर्मत तालिम सम्पन्न भएको छ । बुधबार सम्पन्न भएको तालिममा ४८ जना प्रशिक्षार्थीहरुको सहभागिता रहेको थियो ।
तालिममा सहभागी मध्ये उत्कृष्टताको आधारमा सुदिप रिमाल प्रथम, गिरिराज पौडेल द्धितीय र स्वयज्ञा भूषाल तृतीय भएका हुन् भने कफीको उत्कृष्ट डिजाइनरको रुपमा एलिसा थपलिया र उत्कृष्ट कार्यसम्पादनको रुपमा स्वयज्ञा भूषाल पुरस्कृत भएका छन् ।
- ADVERTISEMENT -
तालिमको समयमा छ जनाले जागिर र २ जनाले व्यवसाय सुरु गरेका छन् । तालिममा सहभागी मध्ये प्रिति चौधरी, निसु तामाङ, राष्टी कर्मचार्य, विधान चौधरी, सुमितराज पौडेल, स्वयज्ञा भूषालले सौराहाका होटल तथा रेष्टुरेन्टमा जागिर पाएका हुन् ।
सीप सिक्दासिन्दै राजेन्द्र सापकोटा र उमेश भट्टराईले सौराहामा व्यवसाय सुरु गरेका हुन । उनीहरुले कफी सप सञ्चालनमा ल्याएको सपना कफी एण्ड बारिस्ता स्कुलका अध्यक्ष लोकनाथ शर्माले जानकारी दिए । उक्त सीप मुलक तालिम बुधबार सकिएको छ ।
- ADVERTISEMENT -
समापन कार्यक्रममा मध्यवर्ती क्षेत्र व्यवस्थापन समितिका अध्यक्ष प्रकास ढुंगाना, चितवन निकुञ्जका प्रमुख संरक्षण अधिकृत डिलबहादुर पुर्जापुन, मृगकुञ्जका अध्यक्ष दुर्गाप्रसाद घिमिरे, सपना भिलेजका अध्यक्ष ध्रुव गिरीले पुरस्कार र प्रमाणपत्र हस्तान्तरण गरेका थिए ।
कार्यक्रमका प्रमुख अतिथि समेत रहेका अध्यक्ष ढुंगानाले रोजगारी, आयआर्जन र संरक्षणलाई संगसंगै अगाडि बढाउने मध्यवर्तीको अबधारण रहेको बताए । संरक्षणलाई प्रभावकारी बनाउन आयआर्जनलाई उत्तीकै महत्व दिनुपर्नेमा जोड दिए ।
प्रमुख संरक्षण अधिकृत पुर्जापुनले वन तथा वन्यजन्तुको संरक्षणलाई थप मजबुत बनाउन मध्यवर्तीका युवाहरुको लगाव आवश्यक रहेको बताए । सपना भिलेजका अध्यक्ष गिरीले स्थानीय सरकार र अन्यसंघसंस्थाहरुसंग सहकार्य गरी सपना भिलेजले रोजगारी र्सिजना गर्ने विभिन्न सीपमुलक कार्यक्रम आयोजना गर्दै आएको बताए ।
मृगकुञ्जका अध्यक्ष घिमिरेले कृषि,संस्कृति र पर्यटनको माध्यमबाट रोजगारी र आयआर्जन र्सिजना गर्ने गरी कार्यक्रम अगाडि बढाइएको बताए । जीविकोपार्जनको बैकल्पिक आधार तयार नगरी संरक्षणलाई प्रभावकारी बनाउन नसकिने भन्दै उनले रोगजारीको लागि सीपमुलक तालिम आयोजना गर्दै आएको बताए ।
मृगकुञ्जले सञ्चालन गरेका २७ वटा संरक्षणमुलक कार्यक्रम मध्ये युवा केन्द्रीत सीप मुलक तालिम, मुसहर महिलालाई तरकारी खेती तालिम प्रभावकारी भएको घिमिरेले बताए । कार्यक्रममा वडा नं ५ का वडाध्यक्ष बालकृष्ण चापागाईँ, राष्ट्रिय प्रकृति संरक्षण कोष सौराहाकी प्रमुख रचना शाह, क्षेत्रीय होटल संघका सचिव महेश खनाल लगायतले मन्तव्य राखेका थिए ।
मृगकुञ्जका अध्यक्ष घिमिरेको अध्यक्षतामा भएको कार्यक्रममा मृगकुञ्जका कार्यसमिति सदस्य बुद्धिमान विकले स्वागत मन्तव्य राखेका थिए । कार्यक्रम सपना कफी एण्ड बारिस्ता स्कुलका सञ्चालक सुदिप भट्टराईले सञ्चालन गरेका थिए ।
