चितवन / चिकित्सकले अत्यधिक वायु प्रदुषण बढेकोले सावधानी अपनाउन सुझाव दिएका छन् । चितवनमा पछिल्लो समय विभिन्न कारणबाट वायु प्रदुषण बढेसँगै सावधानी अपनाउन सुझाव दिएका हुन् ।
यतिबेला चितवन राष्ट्रिय निकुञ्ज, मध्यवर्ती सामुदायिक वन र सामुदायिक वनहरुमा यतिबेला डढेलो लागेको छ । कतै घाँसे मैदान व्यवस्थापन गर्न र कतिपय प्राकृतिक कारणबाट पनि डढेलो फैलिएको हो । सर्वसाधारणहरुले पनि कृषिजन्य उत्पादनका फोहर र अन्य फोहर जलाउने गरेका कारण वायुमण्डलमा धुवाको मात्रा अत्याधिक बढेको छ ।
- ADVERTISEMENT -
यस्तै सडक लगायतका पूर्वाधार निर्माणका कारण पनि वायु प्रदूषणमा थप बल पुगेको छ । सवारी साधन र कलकारखानाबाट धुलो र धुँवा उड्दा यहाँको वातावरण अस्वस्थकर बन्दै गएको छ । वायु प्रदुषणका कारण आँखा पोल्ने, श्वासप्रश्वास बढ्ने, छाला चिलाउने लगायतका समस्या देखिन थालेका छन् ।
भरतपुर अस्पतालका फिजिसियन डा. प्रतिक न्यौपाने वायु प्रदुषणको असर श्वासप्रस्वासमा पर्ने बताए । उनले भने, ‘वातावरण प्रदुषित हुँदा दमका बिरामीहरुलाई अस्पतालमा राखेर उपचार गर्नुपर्ने अवस्था आउन सक्छ ।’ अक्सिजनको मात्रा कम हुने जस्ता समस्या हुने उनले बताए ।
- ADVERTISEMENT -
वायुमण्डलमा हुने ‘एयर क्वालिटी इन्डेक्स’ को मात्रा बढी हुँदा त्यसको असर जीवजन्तु र मानवमा स्वास्थ्य पर्ने उनको भनाइ छ । वायु प्रदुषण निरन्तर रहेमा बालबालिकामा दमको समस्या देखा पर्न सक्ने भएकाले सजग रहन सुझाव दिए ।
वायु प्रदुषणका कारण मुख सुख्खा हुने, नाक सुख्खा हुने हुँदा नियमित पर्याप्त मात्रामा पानी र झोलिलो पदार्थ सेवन गर्न उनले सुझाव दिए । डा. न्यौपानेले भने, ‘सकभर घरभित्रै बस्नुपर्छ, बाहिर निस्कनै परे माक्स लगाएर निस्कनुपर्छ ।’
वायु प्रदूषणका कारण भरतपुरका अस्पताल श्वासप्रश्वासका बिरामीको संख्या बढ्दै गएको छ । भरतपुर आँखा अस्पतालका नेत्र रोग विशेषज्ञ प्राडा सुनु दुलाल वायुमण्डलमा भएको प्रदुषणका कारण टाउकोदेखि माथिका भागहरुलाई बढी असर गर्ने बताए ।
आँखा पोल्ने, बिझाउने, सुख्खा हुने जस्ता समस्या देखिने भन्दै उनले भने, “वायु प्रदुषण बढ्दा आँखा पोल्ने बिझाउने हुन्छ, तर आँखा मिच्नु हुँदैन ।”
आँखा मिच्दा आँखामा घाउ हुन सक्ने र अन्धोपन समेत देखिन सक्ने तर्फ उहाँले सचेत गराए । वायु प्रदुषणबाट बाँच्नका लागि चस्मा लगाउने, आँखा समय समयमा सफा पानीले धुने, चिसो कपडाले पुच्छ्ने जस्ता काम गर्नुपर्ने उनले बताए । एयर क्वालिटी इण्डेक्सले चितवन र आसपासका धेरै ठाउँमा डढेलो लागेको देखाएको छ ।
