सिरहा / ट्रक र मोटरसाइकल एकापसमा ठोक्किएर दुर्घटना हुँदा दुई जनाको मृत्यु भएको छ । सिरहाको धनगढीमाई नगरपालिका ७ कसहामा शनिबार उक्त दुर्घटना भएको हो ।
प्रहरीका अनुसार पश्चिमबाट पूर्वतिर आउँदै गरेको प्र २–०३–००१ ख नम्बरको ट्रक र विपरीत दिशाबाट आइरहेको स। ५ प १९९० नम्बरको मोटरसाइकल आपसमा ठोक्किँदा मोटरसाइकलमा सवार दुबै जनाको मृत्यु भएको हो ।
- ADVERTISEMENT -
मृत्यु हुनेहरुमा धनगढीमाइ ८ का ३१ वर्षीय राजेश्वर यादव र १४ वर्षीय लालबाबु यादव रहेका छन् । दुर्घटनामा परेर दुबै जनाको घटनास्थलमै मृत्यु भएको हो ।
मृत्यु भएका दुवै जनाको शव पोस्टमार्टमका लागि प्रादेशिक अस्पताल लहान पठाइएको छ ।
- ADVERTISEMENT -
ट्रक र चालकलाई प्रहरीले नियन्त्रणमा लिई घटनाको बारेमा आवश्यक अनुसन्धान गरिरहेको छ ।
लडेर एक जनाको मृत्यु
यस्तै सिन्धुलीमा जडीबुटी खोज्ने क्रममा लडेर एक पुरुषको लडेर मृत्यु भएको छ ।
मृत्यु हुनेमा जिल्लाको मरिण गाउँपालिका–२ कटनडाँडाका ५८ वर्षीय टेकबहादुर दंगाली रहेको जिल्ला प्रहरी कार्यालय सिन्धुलीले जनाएको छ ।
प्रहरीका अनुसार, दंगाली जेठ ३२ गते दिउँसो १ बजे जंगल गएका थिए । तर, राति अबेरसम्म नफर्किएपछि खोज्ने क्रममा शनिबार मुंग्रशिर भीरको खोंचमा उनी मृत अवस्थामा भेटिएका हुन् ।
मृतक दंगालीको शव पोष्टमार्टमपछि आफन्तको जिम्मा लगाएको जनाइएको छ ।
