काठमाडौं / बाँकेको जानकी गाउँपालिका–६ स्थित सडकमा शुक्रबार बिहान बसको ठक्करबाट एक पैदलयात्रीको मृत्यु भएको छ ।
नेपालगन्जबाट कोहलपुरतर्फ जाँदै गरेको लु.२ ख ४६ नम्बरको बसले ठक्कर दिँदा एक पैदलयात्रीको मृत्यु भएको हो ।
- ADVERTISEMENT -
बसको ठक्करबाट पैदलयात्री जानकी गाउँपालिका–६ कोठारपुर बस्ने ६० वर्षीया कलावती भाटको मृत्यु भएको प्रहरीले जनाएको छ ।
प्रहरीका अनुसार, बसको ठक्करबाट गम्भीर घाइते भएकी उनको नर्सिङ होम नेपालगन्जमा उपचारको क्रममा मृत्यु भएको हो ।
बस चालकलाई प्रहरीले नियन्त्रणमा लिई थप अनुसन्धान गरिरहेको छ ।
यस्तैगरी, मुस्ताङमा शुक्रबार ढिस्कोले पुरिएर २ मजदुरको मृत्यु भएको छ ।
घरपझोङ गाउँपालिका ५ ढुम्बामा गुम्बाको नाला खन्ने क्रममा ढिस्को झरेर पुरिँदा दुई मजदुरको मृत्यु भएको प्रहरीले जनाएको छ ।
मृत्यु हुनेमा सर्लाहीको लालबन्दी नगरपालिका १५ का २३ वर्षीय होमबहादुर बुढाथोकी र दाङको गढवा गाउँपालिका १ घर भएका २३ वर्षकै रवि दर्लामी रहेका छन् ।
ढिस्कोले पुरिएर उनीहरूको घटनास्थलमै मृत्यु भएको मुस्ताङ प्रहरीले जनाएको छ ।
मृतक दुबै शव पोष्टमार्टमका लागि जिल्ला अस्पतालमा राखिएको छ भने प्रहरीले घटनाको विषयमा आवश्यक अनुसन्धान गरिरहेको छ ।
