– बबिलाल तामाङ
चितवन । जिल्लामा डेंगु सङ्क्रमण तीव्र गतिमा बढ्दै गएको पाइएको छ । जनस्वास्थ्य कार्यालय चितवनका अनुसार भदौ १ सम्म ४१३ जनामा डेंगुको सङ्क्रमण देखिएको छ । सङ्क्रमितमध्ये २९१ जना चितवनकै बिरामी हुन् भने १२२ जना बाहिरी जिल्लाका बिरामी छन् ।
चितवनमा साउन १ देखि भदौ १ सम्म कुल एक हजार ५९१ जनाको डेंगु परीक्षण गरिएकोमा ४१३ जनामा सङ्क्रमण पुष्टि भएको हो । गत चौबिसघन्टामा थप २४ जना नयाँ सङ्क्रमित थपिएका छन् । जसमा भरतपुर महानगरमा चार, माडी नगरपालिकामा एक, रत्ननगरमा आठ र इच्छाकामनाका चार जना रहेका छन् । अन्य जिल्लाबाट परीक्षण गराएका सात जना छन् ।
- ADVERTISEMENT -
जनस्वास्थ्य कार्यालय चितवनले दिएको जानकारीअनुसार भरतपुर महानगरपालिकामा हालसम्म ४८ जनामा डेंगु देखिएको छ । जसमा १८ पुरूष र ३० महिला रहेका छन् । यस्तै, खैरहनीमा छ पुरूष र चार महिला गरी १० जना, रत्ननगरमा २५ पुरूष र १८ महिला गरी ४३, राप्ती र माडीमा एक÷एक महिला, कालिकामा दुई पुरूष र चार महिला गरी छ, इच्छाकामनामा ७९ पुरूष र १०३ महिला गरी १८२ जनामा डेंगुको सङ्क्रमण भएको छ । यस्तै, अन्य जिल्लाका ५७ पुरूष र ६५ महिला गरी १२२ जना रहेका छन् ।
गत आर्थिक वर्षमा सबैभन्दा धेरै भरतपुर महानगरपालिकाभित्र डेंगुको सङ्क्रमण फैलिएको थियो । वर्षभरिमा भरतपुरमा ६६४, रत्ननगरमा २३१, खैरहनीमा १७८, राप्तीमा ७७, इच्छाकामनामा ५४, माडीमा २९ र कालिकामा २६ जना गरी एक हजार ७७१ जनामा डेंगुको सङ्क्रमण पुष्टि भएको थियो । गत आर्थिक वर्षमा २३ हजार ५७१ जनामा डेंगुको परीक्षण गरिएको थियो ।
- ADVERTISEMENT -
जिल्ला जनस्वास्थ्य कार्यालय चितवनले चितवनका सबै पालिकासँग समन्वय गरेर यसवर्ष पनि ‘लामखुट्टेको लार्भा खोज र नष्ट गर’ अभियानलाई निरन्तरता दिँदै आएको छ । जिल्ला जनस्वास्थ्य कार्यालय चितवनका भेक्टर कन्ट्रोल निरीक्षक रामकुमार केसीका अनुसार गत असारदेखि नै जिल्लाका विभिन्न पालिकाहरुमा यो अभियान चलाउन सुरू गरिएको हो ।
रत्ननगर नगरपालिकाका स्वास्थ्य शाखा प्रमुख जनस्वास्थ्य अधिकृत माधवप्रसाद पौडेलका अनुसार यसवर्ष डेंगुको सङ्क्रमण तीव्ररुपमा बढ्न थालेको छ । डेंगु फैलिन नदिन रत्ननगरका सबै वडामा डेंगु खोज र नष्ट गर अभियान तीवरुपमा सञ्चालन भइरहेको र सङ्क्रमण अझै बढ्न सक्ने भएकाले उच्च सावधानी अपनाउनुपर्ने उनले बताए ।
जनस्वास्थ्य अधिकृत पौडेलका अनुसार यो रोग एडिस जातको पोथी लामखुट्टेको टोकाइबाट सर्ने गर्दछ ।
यो लामखुट्टेले प्रायःबिहान र बेलुकाको समयमा टोक्छ । वर्षात्को महिनासँगै जताततै पानी जम्न थालेपछि यो रोग देखिने गर्छ ।
डेंगु ज्वरो नेपालमा पहिलोपटक सन् २००४ मा चितवनमा देखिएको थियो । चितवन घुम्न आएका एक जापानी पर्यटकमा यो रोग पुष्टि भएको थियो ।
उनलाई सामान्य ज्वरो आएका कारण उपचारपश्चात् जापान फर्किएर परीक्षणका क्रममा डेंगु पुष्टि भएको थियो ।
त्यसपछि सन २००६ मा तराई र भित्री मधेसका केही जिल्लामा डेंगुका बिरामी भेटिएका थिए । सन् २००९ मा चितवनमा नौ जनामा डेंगुको सङ्क्रमण देखिएको थियो ।
योसँगै आपसका जिल्लाबाट पनि ज्वरोका बिरामी उपचारका लागि चितवन आउने गरेका थिए । सन् २०१० मा तीन हजार दुई सय ९८ जनाको परीक्षणका क्रममा सात सय ३९ जनामा डेंगु सङ्क्रमण देखिएको थियो ।
जनस्वास्थ्य कार्यालयका अनुसार चितवनमा २०८० साउनदेखि २०८१ असारसम्म कुल २३ हजार आठ सय ४० जनाको परीक्षण गरिएकोमा एक हजार आठ सय ३१ जनामा डेंगुको सङ्क्रमण देखिएको थियो ।
