काठमाडौं / इरानले मध्यपूर्वमा तनाव थप चर्काउँदै कतारमा अवस्थित अमेरिकाको रणनीतिक रूपमा महत्त्वपूर्ण मानिने अल उदेद सैन्य अखडालाई लक्षित गरी क्षेप्यास्त्र प्रहार गरेको छ । यो आक्रमणले इरान र इजरायलबीच बढ्दो द्वन्द्वलाई नयाँ र खतरनाक मोडमा पुऱ्याएको छ ।
कतारी अधिकारीहरूका अनुसार, इरानले कम्तीमा छ वटा क्षेप्यास्त्र प्रहार गरेको थियो । तीमध्ये अधिकांशलाई कतारको शक्तिशाली वायु प्रतिरक्षा प्रणाली (Air Defense System) ले सफलतापूर्वक निष्क्रिय पारेको थियो भने एउटा क्षेप्यास्त्र मात्र बेसको हाताभित्र खसेको बताइएको छ । आक्रमणबाट भएको क्षतिबारे विस्तृत विवरण भने सार्वजनिक गरिएको छैन ।
- ADVERTISEMENT -
आक्रमणलगत्तै कतारको परराष्ट्र मन्त्रालयका प्रवक्ता माजेद अल(अन्सारीले स्थितिलाई नियन्त्रणमा लिइएको र जनजीवन सामान्य अवस्थामा फर्किसकेको बताएका छन् । दोहा न्यूजसँग कुरा गर्दै उनले नागरिकहरूलाई त्रसित नहुन र कुनै पनि गम्भीर खतरा नरहेकोमा आश्वस्त पारे । सुरक्षाका लागि अस्थायी रूपमा बन्द गरिएको कतारको हवाई क्षेत्र पनि पुनः सञ्चालनमा आएको छ ।
यो आक्रमणलाई हालै सिरियाको दमास्कसमा रहेको इरानी वाणिज्य दूतावासमा भएको घातक हमलाको बदलास्वरुप इरानले चालेको कदमका रूपमा हेरिएको छ । उक्त हमलामा इजरायलको संलग्नता रहेको इरानले आरोप लगाउँदै आएको छ । इरान(इजरायलबीचको यो पछिल्लो तनावलाई मध्यनजर गर्दै कतारले आफ्नो देशमा सुरक्षा सतर्कता उच्च बनाएको छ ।
यद्यपि कतारमा स्थिति सामान्य बन्दै गए पनि यो घटनाले मध्यपूर्वको भूराजनीतिमा नयाँ तरंग सिर्जना गरेको छ । अमेरिकी सैन्य अखडामाथिको प्रत्यक्ष आक्रमणले क्षेत्रीय द्वन्द्व थप विस्तार हुन सक्ने चिन्ता बढाएको छ र अन्तर्राष्ट्रिय समुदायले परिस्थितिलाई नजिकबाट नियालिरहेको छ ।
