काठमाडौं / राष्ट्रिय स्वतन्त्र पार्टी (रास्वपा) केन्द्रीय सार्वजनिक मामिला विभागका सचिव बदन भण्डारीमाथि गएराति राजधानीको कपनस्थित उनको घर नजिकै सांघातिक कुटपिट भएको छ । कुटपिटबाट भण्डारीको टाउकोमा गम्भीर चोट लागेको र १० वटा टाँका लगाउनुपरेको रास्वपाले जनाएको छ ।
पार्टीका नेता दीपक बोहोराका अनुसार भण्डारीको सिटी स्क्यान रिपोर्ट सकारात्मक आए पनि आज फलोअपका लागि अस्पताल बोलाइएको छ । बुधबार राति करिब आठ बजेतिर कपनको फैकास्थित कार्यालयबाट प्रगतिनगरस्थित घर फर्किंदै गर्दा उनीमाथि आक्रमण भएको थियो ।
- ADVERTISEMENT -
भण्डारीका अनुसार, मोटरसाइकलमा आएका तीन जनामध्ये एक जनाले उनको टाउकोमा रडले प्रहार गरेका थिए भने अर्को व्यक्तिले खुट्टामा आक्रमण गरेका थिए । उनले भागेर घरभित्र छिरेपछि आक्रमणकारीहरू भागेको बताएका छन् । घटनालगत्तै भण्डारीलाई चाबहिल चुच्चेपाटीमा रहेको स्तूपा सामुदायिक अस्पतालमा उपचारका लागि लगिएको थियो ।
आक्रमणमा संलग्न आक्रमणकारीहरूको पहिचान हुन सकेको छैन । रास्वपाले घटनाबारे प्रहरीलाई जानकारी गराएको छ र बौद्ध प्रहरीले अनुसन्धान जारी रहेको बताएको छ ।
- ADVERTISEMENT -
