काठमाडौं / प्रधानमन्त्री सुशीला कार्कीले भविष्यको नेपाल निर्माणमा जेनजी पुस्तालाई अर्थपूर्ण रूपमा सहभागी गराउन नयाँ संयन्त्र स्थापना गर्ने प्रतिबद्धता व्यक्त गरेकी छिन् । जेनजी आन्दोलनको एक महिना पुगेको अवसरमा बिहीबार एक भिडियो सन्देश जारी गर्दै उनले सबैलाई संयम अपनाउन र हिंसाको चक्र रोक्न हार्दिक अपिल गरेकी हुन् ।
प्रधानमन्त्री कार्कीले युवाहरूको बलिदानबाट प्राप्त यस राजनीतिक क्रान्तिको भावनालाई आत्मसाथ गर्नुपर्नेमा जोड दिइन् । उनले भनिन्, ‘भविष्यको नेपाल निर्माणमा जेनजीलाई अर्थपूर्ण रूपमा सहभागी गराउन नयाँ संयन्त्र स्थापना गर्नेछौँ । आजका दिन म सबैलाई संयम राख्न र हिंसाको चक्र रोक्न अपिल गर्न चाहन्छु । यो दुःखद घटनालाई नयाँ नेपाल निर्माणको जग बनाउन हामीहरूलाई आपसी सद्भाव र राष्ट्रिय एकता आवश्यक छ ।’
- ADVERTISEMENT -
प्रधानमन्त्री कार्कीले आफ्नो नेतृत्वको सरकार युवाहरूले चाहेको परिवर्तनबारे जानकार रहेको र त्यसप्रति प्रतिबद्ध पनि रहेको स्पष्ट पारिन् । उनले विगतका सरकारहरूले युवाहरूको आवाज सुन्न नसकेको स्वीकार गर्दै यसका लागि सबैले आफ्नो कमजोरी र गल्तीलाई विनम्रतापूर्वक स्वीकार गर्नुपर्ने बताइन् । ‘हामी युवा पुस्ताले चाहेको परिवर्तनप्रति प्रतिबद्ध छौँ र नयाँ मार्गमा अघि बढिरहेका छौँ,’ उनले थपिन्, ‘यो माग आगामी निर्वाचनपछि पनि निरन्तर कायम रहनुपर्छ ।’
प्रधानमन्त्रीले युवाहरूमा व्याप्त निराशा र देशप्रतिको अगाध प्रेम दुवैलाई सम्मान गर्ने बताउँदै उनीहरूको बलिदान पछाडि राजनीतिक र आर्थिक सुधार, न्याय, विधिको शासन, भ्रष्टाचार तथा बेथिति उन्मूलनको तीव्र चाहना रहेको उल्लेख गरिन् ।
- ADVERTISEMENT -
सरकारले पीडित परिवारलाई राहत र घाइतेको उपचारका लागि विशेष कार्यक्रम अघि सारेको र उनीहरूको कल्याणका लागि थप संयन्त्र बनाउने क्रममा रहेको जानकारी दिइन् । भ्रष्टाचार, बेरोजगारी, विभेदजस्ता समस्यालाई सम्बोधन गर्न राजनीतिक र प्रशासनिक सुधार गर्ने प्रतिबद्धता पनि प्रधानमन्त्रीले जनाइन् ।
उनले वर्तमान सरकार र निर्वाचनपछि आउने नयाँ सरकार दुवैले युवाहरूको सपना साकार पार्न र समृद्ध नेपाल बनाउन ठोस कदम चाल्ने आशा व्यक्त गरिन् । प्रधानमन्त्री कार्कीले अन्त्यमा शहीदहरूको बलिदान खेर जान नदिन अधिकतम प्रयास गरिने र संकटको यो घडीमा सबै एक भएर अघि बढ्ने विश्वास व्यक्त गरिन् ।
