काठमाडौं / आईसीसी टी–२० विश्वकप एसिया र इस्ट एसिया प्यासिफिक छनोटको सुपर सिक्समा आज नेपालले तालिकाको शीर्षक स्थानको ओमानको सामना गर्दैछ । यो खेल नेपालको २०२६ को टी–२० विश्वकप यात्राका लागि निर्णायक मोड बन्नेछ ।
यसअघि सुपर सिक्समा युएईलाई १ रन र कतारलाई ५ रनको रोमाञ्चक अन्तरले पराजित गर्दै नेपालले आफ्नो बलियो उपस्थिति दर्ता गराइसकेको छ । आज (बुधबार) राति ८ः४५ बजे सुरु हुने ओमानविरुद्धको खेलमा विजयी भएमा नेपाल सीधै टी–२० विश्वकपका लागि छनोट हुनेछ ।
- ADVERTISEMENT -
सुपर सिक्सको अंकतालिकामा ओमान र नेपाल दुवैले समान ६–६ अंक बटुलेका छन् । यद्यपि, रनरेटका आधारमा ओमान शीर्ष स्थानमा छ भने नेपाल दोस्रो स्थानमा अटाएको छ । दुई अंकसहित युएई र जापान क्रमशः तेस्रो र चौथो स्थानमा छन् भने कतार र सामोआ अंकविहीन छन् ।
सुपर सिक्समा सहभागी ६ टोली (नेपाल, युएई, ओमान, जापान, कतार र सामोआ) मध्ये शीर्ष तीनमा रहने टोलीले भारत र श्रीलंकामा आयोजना हुने २०२६ को टी–२० विश्वकपमा स्थान बनाउनेछन् । नेपालले ओमानलाई पराजित गरेमा मात्र होइन, शुक्रबार सामोआसँगको अन्तिम खेल अघि नै विश्वकपमा आफ्नो स्थान सुरक्षित गर्ने अवसर पाउनेछ ।
- ADVERTISEMENT -
