जनकपुर । मधेस प्रदेशका नवनियुक्त मुख्यमन्त्री सरोजकुमार यादवले प्रदेशमा भइरहेका आन्दोलन र राजनीतिक अस्थिरतामा भारतको हात रहेको गम्भीर आरोप लगाएका छन् । शनिबार जनकपुरमा मधेसवासीलाई सम्बोधन गर्दै उनले वीरगञ्जस्थित भारतीय काउन्सिलरका प्रतिनिधिमार्फत मधेसमा आन्दोलन भड्काउने र मधेसी जनतालाई दुःख दिने काम भइरहेको बताएका हुन् ।
मुख्यमन्त्री यादवले भारतीय पक्षले मधेसमा दलहरू फुटाउने र जुटाउने धम्कीसमेत दिइरहेको खुलासा गरे । उनले आफूमाथि पनि सुरक्षा थ्रेट रहेको जानकारी दिँदै सुरक्षाकर्मीहरूले आफूलाई सुरक्षा चुनौती रहेको बताउँदै आएको उल्लेख गरे । आन्दोलनकारीहरूले आफूलाई निशाना बनाएको दाबी पनि उनले गरे ।
- ADVERTISEMENT -
“मधेस प्रदेशमा वीरगञ्जमा रहेको काउन्सिलर अफिसका प्रतिनिधिहरू सिधै दलहरूसँग प्रत्यक्ष संवादमा रहेर दलहरूलाई थ्रेट गर्ने, दलहरू फोडिदिन्छु भन्ने, दलहरू जुटाइदिन्छु भन्ने, नेताहरूलाई थ्रेट गर्ने प्रकृतिबाट नै दिनप्रतिदिन क्षणक्षणमा सहमति हुने र सहमति भङ्ग गर्ने वातावरण सिर्जना भएको जानकारी गराउन चाहन्छु,” मुख्यमन्त्री यादवले भने ।
उनले आफू संवैधानिक ढङ्गबाट सरकारको नेतृत्वमा आएको र कुनै माग भए संवादमार्फत समाधानको बाटोमा अघि बढ्न आन्दोलनकारी राजनीतिक दलहरूलाई आग्रह गरे । सुरक्षाको अवस्थाबारे बोल्दै उनले भने, “मलाई नेपाल सरकारको आर्मीको सुरक्षा छ । सशस्त्र प्रहरीको सुरक्षा छ । नेपाल प्रहरीको सुरक्षा छ । तर पनि मलाई सुरक्षा थ्रेट छ । माननीय सभामुखज्यूको सुरक्षामा एउटा टुकडी नै छ प्रहरीको । अन्य मन्त्रीहरूलाई पनि सुरक्षा छ ।”
सुरक्षा निकायको रिपोर्टिङ अनुसार नै आफूलाई कार्यक्रमहरू कम गर्न र संवेदनशील रहन भनिएको उनले बताए । “त्यसो भएको हुनाले हामीसँग पनि सुरक्षा निकायकै रिपोर्टिङ अनुसार मुख्यमन्त्रीज्यू कार्यक्रम कम गर्नुपर्यो, सीमित कार्यक्रमहरू गर्नुपर्यो । अलिकति सुरक्षा चुनौती छ । अलि संवेदनशील भइदिनुपर्यो भनेर आइसकेपछि यी विषयवस्तुहरू मैले कसलाई भन्ने रु सुरक्षा थ्रेट मलाई कोबाट छ रु अरु जनताबाट त हुँदैन । त्यो आन्दोलनकारीबाट नै हुन्छ,” उनले थपे ।
मुख्यमन्त्री यादवले आफू सुरक्षित नभएको अवस्थामा अन्य व्यक्ति र दलका माननीयहरू पनि सुरक्षित हुन नसक्ने तर्क गरे । उनले आफूमाथि आक्रमण हुँदा आफ्ना पार्टी कार्यकर्ता र समर्थकहरूलाई पनि आक्रमण नगर्ला भन्न नसकिने बताए । मुख्यमन्त्री यादवले भारतीय पक्षको दबाबका कारण मधेस प्रदेशमा आन्दोलनकारीहरूसँग वार्तामा बस्ने वातावरणसमेत बन्न नसकेको उल्लेख गरे ।
