काठमाडौं / जाडो याम छिप्पिँदै जाँदा काठमाडौं उपत्यकाको वायुमण्डल थप चिसिन थालेको छ । मौसम पूर्वानुमान महाशाखाको ताजा विवरणअनुसार शनिबारको तुलनामा आइतबार बिहान उपत्यकाको न्यूनतम तापक्रममा गिरावट आएको हो ।
महाशाखाले आइतबार बिहान ५ः४५ बजे गरेको प्रारम्भिक मापनअनुसार काठमाडौंको न्यूनतम तापक्रम ५.६ डिग्री सेल्सियस रेकर्ड भएको छ । अघिल्लो दिन (शनिबार) सोही समयमा उपत्यकाको तापक्रम ५.८ डिग्री सेल्सियस मापन गरिएको थियो । यस तथ्यांकलाई आधार मान्दा २४ घण्टाको अन्तरालमा बिहानीपखको तापक्रममा दशमलव २ डिग्री सेल्सियसले कमी आएको देखिन्छ ।
- ADVERTISEMENT -
यद्यपि, यो आजको अन्तिम र आधिकारिक न्यूनतम तापक्रम भने होइन । महाशाखाले बिहान ८ः४५ बजे पुनः तापक्रम मापन गर्नेछ । बिहानको चिसो हावा र शीतका कारण ५ः४५ को तुलनामा ८ः४५ बजेको तापक्रम अझै घट्न सक्ने सम्भावना रहन्छ ।
तुलनात्मक रूपमा हेर्दा, शनिबार बिहान ८ः४५ बजेको आधिकारिक मापनमा काठमाडौंको न्यूनतम तापक्रम ५.५ डिग्री सेल्सियस कायम भएको थियो । मौसम विज्ञानका अनुसार २४ घण्टाको अवधिमा मापन गरिएको सबैभन्दा कम विन्दुलाई त्यस दिनको न्यूनतम र सबैभन्दा बढी विन्दुलाई अधिकतम तापक्रमका रूपमा अभिलेखीकरण गरिन्छ । महाशाखाले हरेक दिन बिहान ८ः४५ बजे न्यूनतम र साँझ ५ः४५ बजे अधिकतम तापक्रमको आधिकारिक विवरण सार्वजनिक गर्ने गरेको छ ।
