काठमाडौं / आसन्न निर्वाचनका समयमा हुन सक्ने इन्धनको उच्च माग र सम्भावित संकटलाई मध्यनजर गर्दै नेपाल आयल निगमले खाना पकाउने एलपी ग्यासको आयातलाई थप तीव्र बनाएको छ । निर्वाचन अवधिभर बजारमा ग्यासको सहज उपलब्धता कायम राख्न निगमले भारतीय आयल कर्पोरेसनसँगको समन्वयमा लोडिङको दरलाई उच्च बनाएको हो ।
निगमद्वारा उपलब्ध गराइएको पछिल्लो विवरण अनुसार, मंगलबार यो आर्थिक वर्षकै सबैभन्दा धेरै परिमाणमा ग्यास लोड भएको छ । उक्त दिन एकैपटक १३८ बुलेट ग्यास लोड गरिएको हो, जुन करिब १ लाख ७३ हजार ८०० सिलिन्डर बराबरको परिमाण हो । निर्वाचन केन्द्रित विशेष तयारीअन्तर्गत आपूर्ति व्यवस्थालाई सुदृढ बनाउन आयातमा यस्तो बढोत्तरी गरिएको निगमले जनाएको छ ।
- ADVERTISEMENT -
नेपाल आयल निगमका कार्यकारी निर्देशक चण्डिका भट्टले निर्वाचनको समयमा उपभोक्ताले ग्यासको अभाव झेल्नु नपर्ने भन्दै ढुक्क रहन आग्रह गरेका छन् । उनले आपूर्ति प्रणालीलाई नियमित र व्यवस्थित तुल्याइएको जानकारी दिँदै बजारमा हुन सक्ने सम्भावित कृत्रिम अभाव र कालोबजारी नियन्त्रणका लागि भण्डारण र वितरण प्रक्रियालाई अझै चुस्त बनाइएको स्पष्ट पारेका छन् । निर्वाचन अवधिभर पनि ग्यासको आपूर्तिलाई यसैगरी उच्च प्राथमिकतामा राखेर नियमित गरिने निगमको योजना छ ।
