भरतपुर / महिला उद्यमीलाई लक्षित गर्दै चितवनमा आज (शनिबार) ‘युवा महिला उद्यमी शिखर सम्मेलन–२०२६’ हुँदैछ । नेपाली युवा उद्यमी मञ्चको आयोजनामा सिराईचुली होटल भरतपुरमा कार्यक्रम हुन लागेको कार्यक्रम संयोजक सन्ध्या कंडेलले जानकारी दिए ।
कार्यक्रम संयोजक कंडेलका अनुसार महिलालाई उद्यमतर्फ आकर्षित गर्नका लागि शिखर सम्मेलनको आयोजना गर्न लागिएको हो । उनले महिला उद्यमी, व्यवसायीक महिला, विद्यार्थी र भावी उद्यमीहरुलाई एउटै मञ्चमा ल्याउनका लागि सम्मेलनले महत्वपूर्ण भूमिका खेल्ने बताइन् । कार्यक्रममा सहभागि भइदिन समेत उनको आग्रह छ ।
- ADVERTISEMENT -
शनिवार बिहान ११ बजेदेखि साँझ चार बजेसम्म हुने क्रममा प्यानल छलफल समेत हुनेछ । प्यानलिस्टमा प्रार्थना साखा, निकिता जलान, सिता अधिकारी सञ्जीता घिमिरे लगायतका रहेका छन् । प्रमुख वक्ताको रुपमा प्राध्यापक डा शारदा थपलिया रहेकी छिन् । इनपावर इलिभेट नारा दिईएको कार्यक्रममा ४ सय जना सहभागि हुने अनुमान गरिएको छ । कार्यक्रममा सहभागि हुनका लागि प्रतिव्यक्ति एक हजार रुपैयाँ प्रवेश शुल्क तोकिएको छ ।
चितवनमा पहिलोपटक सञ्चालन गर्न लागिएको कार्यक्रममा भाग लिनका लागि चितवन र वरपरका महिला उद्यमीहरुलाई खुल्ला निमन्त्रणा दिएको आयोजकले जानकारी दिएको छ । कार्यक्रममा शैक्षिक, बैंकिङ तथा वित्तीय संस्था र सरकारी निकायहरुसँग पनि साझेदारी रहेको बताइएको छ ।
नेपालमा पुरुषकोभन्दा महिलाको जनसंख्या बढी रहेको छ । तर औपचारिक कर्जामा उनीहरुको पहुँच अझै पनि कम रहेको छ । यस्तो अवस्थामा ज्ञान, सञ्जाल र प्रेरणाको माध्यमबाट त्यो खाडल पुर्नलाई कार्यक्रमको आयोजना गरिएको आयोजकको भनाई छ ।
