चितवनमा ९ लाखका लागि साथीको हत्या

0
38

चितवन / चितवनमा आफ्नै साथीको हत्या गर्ने एक जना पक्राउ परेका छन् । नेपाली सेनाको महेन्द्र दल गण राष्ट्रिय निकुञ्ज टोखामा कार्यरत रहेका गंगाधर ढकालले सोही गणमा कार्यरत जवान भरत गुरुङको हत्या गरेको जिल्ला प्रहरी कार्यालय चितवनले शुक्रबार पत्रकार सम्मेलन गरी जानकारी दिएको छ ।
हिजो बिहीबार बिहान भरतपुर महानगरपालिका वडा नम्बर १७ सिमलडाँडाको नहरमा भरतको शव फेला परेको थियो । ३६ वर्षीय भरत धादिङ निलकण्ठ नगरपालिका निवासी हुन् । भरतको टाउकोमा गोली लागेको थियो ।
जिल्ला प्रहरी कार्यालय चितवनका प्रमुख ओम अधिकारीले ढकाललाई हिजो भरतपुर १८ चनौलीबाट पक्राउ गरिएको जानकारी दिए । भरतलाई रक्सी खुवाएर गंगाधरले राति मोटरसाइकलमा डुलाएको र नहरमा पुगेपछि पिसाब फेर्ने बहानामा झर्न लगाई गोली हानेर भागेको पाइएको एसपी अधिकारीले बताए ।
घटनास्थलबाट एक थान गोलीको खोका बरामद गरिएको अधिकारीले जनाए । यस्तै घटनामा प्रयोग गरिएको मोटरसाइकल, बन्दुक, गोली समेत बरामद गरिएको एसपी अधिकारीले जनाए ।
९ लाख रुपैयाँका लागि ढकालले आफ्नै साथीको हत्या गरेको पाइएको एसपी अधिकारीले बताए । भरतको बैंकमा रहेको रकम गंगाधरले किर्ते गरेर निकालेको र पैसा निकालेपछि भरतको हत्या गरेको पाइएको उनले बताए । भरतको बैंकबाट पैसा निकालेर गंगाधरले आफ्नो घरमा दिएको पाइएको र सो रकम समेत बरामद गरिएको एसपी अधिकारीले जानकारी दिए । घटनाबारे थप अनुसन्धान जारी रहेको उनले बताए ।