समाचार संकलनमा पत्रकारलाई रोक, मन्त्री र राज्यमन्त्रीको सपथ

0
18

मकवानपुर / प्रदेश प्रमुखको कार्यालय बागमतीमा पत्रकारलाई प्रवेशमा रोक लगाइएको छ । बुधबार नवनियुक्त मन्त्री तथा राज्यमन्त्रीको सपथ कार्यक्रममा सूचना संकलनार्थ पुगेका पत्रकारहरुलाई प्रवेशमा रोक लगाइएको हो ।
प्रदेश प्रमुख कार्यालयका सचिव नारायणप्रसाद भट्टले मुख्यद्वारमा सुरक्षाकर्मी तैनाथ गरी पत्रकारलाई प्रवेशमा रोक लगाएका हुन् ।
पत्रकारले कोरोना सार्छन् भन्दै सचिव भट्टले प्रवेशमा रोक लगाएका थिए।
सूचना संकलनका लागि सो कार्यालय परिसरमा पुगेका पत्रकारहरुले क्यामेर गेट अगाडि राखेर धर्नासमेत दिएका थिए ।
पत्रकार महासंघ मकवानपुरका अध्यक्ष मणिराज गौतमले प्रदेश प्रमुख कार्यालयका सचिवद्वारा संचारकर्मीलाई सूचना संकलनमा बन्देज लगाउने प्रयास गरिनु निन्दनीय भएको बताएका छन् । जनतालाई सुसूचित गराउन अहोरात्र खटिएका पत्रकारलाई प्रवेशमा रोक लगाउने कार्यप्रति उनले भत्सर्ना गरेका छन् ।
‘मँ पनि त्यहाँ पुगेको थिएँ । पत्रकारलाई प्रवेश निषेध गरेपछि म मात्रै सपथ कार्यक्रममा सहभागी भइन, बरु पत्रकारहरुसंगै धर्ना बसेँ ।’
आगामी दिनमा यस्ता गतिविधि नदोहोर्याउन र पत्रकारलाई सहजै सूचनाको पहुँचमा पुग्ने व्यवस्था मिलानसमेत अध्यक्ष गौतमले माग गरे ।
यस विषयमा तु खबरले सचिव भट्टसंग कुरा गर्दा उनले कोरोना संक्रमणको जोखिम कायमै रहेकोले प्रवेशमा रोक लगाइएको बताए ।
उनले भने ‘पत्रकारहरुबाटै कोरोना सर्ला भन्ने जोखिम भो । पत्रकारहरु बिल्ला भिरेर हुलका हुल आउँछन् अनि कसरी छिराउनु त ?’
सचिव भट्टले राजनीतिक दलका कार्यकर्ता र घरजग्गा व्यवसायीलाई भने भने सपथ कार्यक्रममा प्रवेश गर्न दिएका थिए ।