चितवन थप खुकुलो, असोज १५ सम्म निषेधाज्ञा

0
14

चितवन / चितवनमा जारी निषेधाज्ञालाई १५ दिन थप गरिएको छ । जिल्ला प्रशासन कार्यालय चितवनले आज बुधबार एक सूचना जारी गर्दै असोज १५ गतेसम्म निषेधाज्ञा थप गरिएको जनाएको छ ।
पछिल्ला दिनहरुमा कोरोना संक्रमणदर र मृत्युदर क्रमशः घट्दै गएपछि निषेधाज्ञालाई थप खुकुलो गर्दै लगिएको छ । जारी आदेशमा सिने हल र सभा सम्मेलन बाहेक अन्य क्षेत्रलाई थप खुकुलो पारिएको सूचनामा उल्लेख छ ।
जारी निषेधाज्ञा भाद्र ३१ गते राती १२ बजे सकिंदैछ । कार्यालयका सूचना अधिकारी खेमराज पौडेलले पछिल्ला समयमा कोरोना संक्रमित दर र मृत्युदरमा क्रमशः कमी हुँदै आएकोले निषेधाज्ञा खुकुलो गर्दै लगिएको बताए । चितवनमा यसअघि गरिएको निषेधाज्ञामा सक्रिय सङ्क्रमितको संख्या एक हजार हाराहारीमा थियो भने अहिले सात सय भन्दा पनि कम रहेको उनले भने ।
जारी आदेशमा सभा सेमिनारका लागि मापदण्ड अपनाएर सीमित संख्यामा मानिस रहेर सञ्चालन गर्न अनुमति दिइएता पनि सिनेमा हलका लागि हल सञ्चालकले कार्यविधि पेश गरेमा सोही अनुसार अनुमति दिइने उल्लेख छ । विद्यालय खोल्ने हकमा विद्यालय व्यवस्थापन समिति र स्थानीय सरकारको समन्वयमा असोज १ गतेदेखि सञ्चालन गर्न सकिने पौडेलले बताउनुभयो ।
अन्य आदेशहरू पहिलेकै नियम अनुरूप चल्ने कार्यालयले बताएको छ । आदेशमा संक्रमित दर थप घट्दै या बढ्न गएमा जारी गरिएको निषेधाज्ञाको समयावधि भित्रनै आदेश संशोधन एवं पुनरावलोकन गर्न सकिने जारी आदेशमा उल्लेख छ ।