कैलाश कप सेभेन ए साइड फुटबल प्रतियोगिता भोलिबाट सुरु

0
30

चितवन / कैलाश कप सेभेन ए साइड फुटबल प्रतियोगिता बिहीबारदेखि सुरु हुने भएको छ । कैलाश युथ क्लब भरतपुर ११ को आयोजनामा उक्त प्रतियोगिता हुन लागेको हो ।
प्रतियोगितामा चितवन, नवलपरासी र मकवानपुरका विभिन्न ३२ टोलीको सहभागीता रहनेछ । सहभागी टोलीलाई दुई समूहमा बिभाजन गरिएको छ । दुबै समूहबाट एक–एक टोली फाइनलमा प्रवेश गर्नेछन् ।
प्रतियोगिताको उद्घाटन खेलमा सर्वश्रेष्ठ नारायणी र वनदेवी क्लब भिड्नेछन् । खेल दिउँसो १२ बजे कैलाश क्लबको मैदानमा हुनेछ । फाइनल खेल १७ गते हुनेछ ।
प्रतियोगिताको बिजेताले नगद ४२ हजारसहित ट्रफी प्राप्त गर्नेछ । उपबिजेताले २२ हजार रुपैयाँ प्राप्त गर्ने प्रतियोगिताको खेल संयोजक सबिन अधिकारीले जानकारी दिए । यस्तै विधागत उत्कृष्ट खेलाडीहरुले पनि पुरस्कार प्राप्त गर्नेछन् ।
प्रतियोगिताको मुख्य प्रायोजकमा सेन्ट्रल कलेज अफ भोकेसनल ट्रेनिङ तथा सहप्रायोजकमा नव जागृति सामुदायिक वन रहेका छन् ।
कोभिडले थलेको खेल क्षेत्रलाई चलायमान बनाउनका लागि प्रतियोगिता आयोजना गरिएको क्लबका अध्यक्ष किरण मरहट्ठाले बताए ।
प्रतियोगिताका मुख्य प्रायोजक सेन्ट्रल कलेजका प्रिन्सिपल यज्ञबिलास पौडेल (वाईवि) ले फुटबलको विकासका लागि सहकार्य गर्न सदैव तयार रहेको बताए ।
सह प्रायोजक नव जागृति सामुदायिक वनका अध्यक्ष देव गुरुङले यस किसिमको प्रतियोगिताले स्थानीय खेलाडीको क्षमता विकासमा सहयोग पुग्ने विश्वास व्यक्त गरे ।