सडकमासमेत व्यवसायिकता देखिने गरी काम गर्नु : प्रहरी महानिरीक्षक

0
14
फोटो : तेमाल अनलाइन ।

काठमाडौँ / प्रहरी महानिरीक्षक शैलेश थापा क्षेत्रीले प्रहरी प्रधान कार्यालयमा आइतबार आयोजित एक कार्यक्रमबीच प्रहरी कर्मचारीहरूले पालना गर्नुपर्ने आचार संहिता सम्बन्धी कार्यादेश २०७७ सार्वजनिक गरेका छन् । साथै महानिरीक्षक क्षेत्रीले नेपाल प्रहरी कार्ययोजना २०७७ को इम्प्लिमेन्टेशन ट्रयाकिङ सफ्टवेयर समेत सोही अवसरमा शुभारम्भ गरेका छन् ।
कार्यक्रममा प्रहरी महानिरीक्षक क्षेत्रीले निर्माण भएका कार्यादेश र निर्देशिकाहरुले संगठनलाई सही मार्गमा लैजान दूरगामी रुपमा सकारात्मक प्रभाव पार्ने उल्लेख गरे । प्रस्तुत कार्यादेशको अनुशरण गर्दै जानुपर्नेमा जोड दिँदै उनले यसले प्रहरीको छविलाई थप राम्रो बनाउन मद्दत पुर्याउने विचार व्यक्त गरे ।
उनले प्रहरी संगठनमा व्यवसायिकता नै मुख्य भएकोले सडकमा समेत व्यवसायिकता देखिने गरी काम गर्न उपस्थित प्रहरी अधिकृतहरुलाई निर्देशन दिए । सबैको साझा शत्रुको रुपमा कोभिड १९ लाई लिई यसको नियन्त्रणमा लाग्नु पर्नेमा उनले जोड दिए ।
कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरु र प्रदेश प्रहरी प्रमुखहरुको भर्चुअल्ली उपस्थिति रहेको थियो ।