आज संविधान दिवस : कृष्णप्रसाद भट्टराई नेपाल रत्न विभूषणबाट सम्मानित गरिने

मकवानपुर / समाजमा विशिष्ट योगदान पुर्याउने विभिन्न व्यक्ति तथा संस्थाहरुलाई सरकारले संविधान दिवस २०७८ को अवसरमा विभूषण, मानपदवी तथा अलंकारबाट सम्मान गर्ने घोषणा गरेको छ । आज सरकारद्वारा घोषित नामावलीनुसार, सबैभन्दा ठूलो विभूषण नेपाल रत्नबाट सन्त नेता तथा पूर्व प्रधानमन्त्री कृष्णप्रसाद भट्टराई सम्मानित हुने भएका छन् ।
दोस्रो ठूलो विभूषण राष्ट्र गौरवबाट पूर्व प्रधानमन्त्री झलनाथ खनाल र मन्त्रिपरिषद्का अध्यक्ष सुवर्णशमशेरलाई प्रदान गर्ने सरकारको निर्णय छ । त्यसैगरी, सरकारले तेस्रो ठूलो महाउज्जवल राष्ट्रद्वीप प्रथम श्रेणीको विभूषण प्रधानन्याधीश चोलेन्द्र शमसेर जबरा, मोहनचन्द्र अधिकारी, तुलसीलाल अमात्य, मंगलादेवी सिंह, दुर्गानन्द झा र नारायण गोपाललाई दिने घोषणा गरेको छ ।
त्यस्तै, सुप्रसिद्ध प्रबल जनसेवा श्री विभूषण प्रदीप नेपाल, पोष्टबहादुर बोगटी, मार्शल जुलुम शाक्य र पीएल सिंहलाई तथा उज्जवल कीर्तिमय राष्ट्रद्वीप न्यायाधीश विश्वम्भर प्रसाद श्रेष्ठलाई प्रदान गरिने भएको छ । राष्ट्रपति विद्यादेवी भण्डारीले शितल निवासमा आयोजित विशेष समारोहमा विभूषण प्रदान गर्ने कार्यक्रम रहेको छ ।
यसैगरी, सरकारले मकवानपुरमा विभिन्न क्षेत्रबाट योगदान पुर्याउने चार जनालाई सम्मान गर्ने भएको छ । सरकारले प्रसिद्ध प्रबल जनसेवा श्री विभूषणबाट मकवानपुरका राजनीतिज्ञ भक्तबहादुर श्रेष्ठ, सुप्रबल जनसेवा श्री विभूषणबाट भौतिक पूर्वाधार तथा विकास मन्त्रालयका सचिव सञ्जिव बराल र प्रहरी नायब महानिरीक्षक ९डिआइजी० प्रकाश जंग कार्की, जनसेवा श्री विभूषणबाट चर्चित पत्रकार तथा तु खबर डटकमका सम्पादक गिरिजाप्रसाद अधिकारीलाई सम्मान गर्ने घोषणा गरेको छ ।