एमालेको देशभर एकैसाथ जिल्ला अधिवेशन, ओलीले भर्चुअलबाट सम्बोधन गर्ने

काठमाडौं / नेपाल कम्युनिष्ट पार्टी एमालेले शुक्रबार देशभर जिल्ला अधिवेशन गर्दैछ । प्रतिकूल मौसमका कारण केही हिमाली जिल्ला र तयारी नपुगेका बाहेक जिल्लामा भने अर्को मितिमा अधिवेशन गर्ने तयारी एमालेको छ ।
एमाले अध्यक्ष केपी ओलीले बिहान ११ बजे जिल्ला अधिवेशनलाई भर्चुअल माध्यमबाट सम्बोधन गर्ने कार्यक्रम छ । यद्यपि, काठमाडौं जिल्लाको छैठौं अधिवेशन उद्घाटनमा भने ओली कागेश्वरी मनोहरा नगरपालिका –६ स्थित मुलपानी क्रिकेट मैदानमा भौतिक रुपमै उपस्थित हुने कार्यक्रम रहेको बताइएको छ । केन्द्रीय कार्यालयको एक्सन रूमबाट एकैसाथ भर्चुअल उद्घाटन र सम्बोधन गर्ने कार्यक्रम रहेको केन्द्रीय प्रचार विभाग उपप्रमुख विष्णु रिजालले बताएका छन् ।
एमालेको १०औं महाधिवेशन गएको मंसिरमै सकिए पनि जिल्ला अधिवेशन एकसाथ गर्न लागिएको बताइएको छ । जिल्ला तहमा समेत सकेसम्म सर्वसम्मत नेतृत्व चयनका लागि पहल गर्न भनी केन्द्रले निर्देशन दिएको छ । काठमाडौको नेतृत्व केन्द्रकै सर्कुलर अनुसार सर्वसहमतिमा हुने भनेर वर्तमान अध्यक्ष कृष्ण राईले बिहीवारै आयोजित पत्रकार सम्मेलनमा जानकारी दिइसकेका छन् ।
जिल्ला तथा प्रदेश अधिवेशनका लागि दशौं राष्ट्रिय महाधिवेशनका लागि निर्धारण गरिएका पार्टी सदस्यलाई नै आधार बनाउन एमालेले उर्दी गरेको छ ।
जिल्ला अधिवेशन सकिए लगत्तै प्रदेश सम्पर्क कमिटी र प्रदेश संगठन कमिटीको अधिवेशनको तयारी थाल्ने एमालेले जनाएको छ । एमालेको प्रदेश अधिवेशनको मिति माघ ८ गतेलाई तोकिएको छ ।