हेटौंडा / हेटौंडा उपमहानगरपालिकाको नगर सभा स्थगित भएको छ । आवश्यक गणपुरक संख्या नपुगेपछि शुक्रबारका लागि आव्हान गरिएको बैठक स्थगित भएको नगर प्रमुख मीना कुमारी लामाले घोषणा गर्नुभयो ।
शुक्रबार बिहान १० बजेका लागि आव्हान गरिएको नगर सभा नेकपा एमालेबाट निर्वाचित नगर सभा सदस्यहरुले उपस्थिति नजनाएसँगै वैठक बस्न नसकेको हो । ९५ जना सदस्य रहेको नगर सभामा शुक्रबार ४० जनाले मात्रै उपस्थिति जनाएका छन् । गणपुरक संख्याको अभावमा बैठक बस्न नसकेको जानकारी गराउनहुँदै नगर प्रमुख मीना कुमारी लामाले अर्को बैठक असार १२ गते बस्ने जानकारी दिनुभयो ।
नेकपा एमालेबाट निर्वाचित जनप्रतिनिधिले आगामी आर्थिक वर्षको नीति, कार्यक्रम र बजेट विधिअनुसार तयार नपारिएको भन्दै विरोध जनाउँदै आएका छन् । नेकपा एमालेबाट निर्वाचित कार्यपालिका सदस्यको असहमतिका बीच नगर कार्यपालिकाको अल्पमतबाटै आगामी आर्थिक वर्षको नीति, कार्यक्रम र बजेट नगर सभामा पेश गर्ने निर्णय गरिएको थियो ।
