मकवानपुर / बागमती प्रदेश सभा अन्तरगत रहेको विभिन्न ५ वटा समितिको सभापति पदको निर्वाचन आगामी जेठ ४ गते हुने भएको छ ।
प्रदेश सभाका सभामुख भुवन कुमार पाठकले प्रदेश सभाको विभिन्न समितिको निर्वाचन गर्ने विषयमा सबै दलहरुबीच सहमति भएको बताउँदै डेढ वर्षदेखि रिक्त पाँच समितिको सभापतिको निर्वाचनबारे जानकारी दिए ।
- ADVERTISEMENT -
सभामुख पाठकले सम्भब भएसम्म सभापति पदको निर्विरोध निर्वाचन गर्ने वा सहमति हुन नसके निर्वाचनमा मतदान प्रक्रियाबाट निर्वाचन सम्पन्न गर्ने बताए ।
उनले यही वैशाख ३१ गते बस्ने प्रदेश सभाको बैठक अघि संसदको कार्य परामर्श व्यवस्थापन समितिको बैठक बस्ने र समहति गरिए अनुसार विभिन्न समितिका सभापति पदको लागि मनोनयन दर्ता गर्ने कार्यसूची तयार गरिने बताए ।
प्रदेश सभाको दोस्रो कार्यकालको निर्वाचन सम्पन्न भए लगत्तै डेढ वर्षदेखी प्रदेश सभाको विभिन्न ५ वटा समितिको सभापती पद रिक्त रहेको छ ।
प्रदेश सभाको नियमावली २०७४ अनुसार प्रदेश सभामा ५ वटा विभिन्न समितिहरु रहने व्यवस्था रहेको छ । प्रदेश सभामा अहिले प्रदेश मामिला समिति, सार्वजनिक लेखा समिति, कृषि, स्वास्थ्य तथा शिक्षा समिति, पर्यटन, उद्योग तथा वाणिज्य समिति, र भूमी तथा सहकारी व्यवस्था समिति रहेका छन् ।
