काठमाडौं / इराकको पश्चिमी मरुभूमि क्षेत्रमा अमेरिकी वायुसेनाको इन्धन भर्ने (रिफ्युलिङ) विशेष विमान दुर्घटनामा परेको छ । अमेरिकी सेनाको सेन्ट्रल कमान्ड (सेन्टकम) का अनुसार बिहीबार ‘केसी–१३५’ नामक स्ट्रयाटोट्यांकर विमान एउटा ‘इन्सिडेन्ट’ मा परेर दुर्घटनाग्रस्त भएको हो ।
सेन्ट्रल कमान्डले जारी गरेको आधिकारिक विज्ञप्ति अनुसार उक्त समयमा दुईवटा विमानहरू सँगै उडानमा रहेका थिए । तीमध्ये एउटा विमान दुर्घटनामा परेको हो भने दोस्रो विमान भने सुरक्षित रूपमा अवतरण गर्न सफल भएको छ । अमेरिकी अधिकारीहरूले यो घटनामा कुनै पनि प्रकारको ‘होस्टायल’ (विपक्षी आक्रमण) वा ‘फ्रेन्ड्ली फायर’ (आफ्नै सेनाको भुलवश हुने प्रहार) को भूमिका नरहेको स्पष्ट पारेका छन् ।
- ADVERTISEMENT -
केही अन्तर्राष्ट्रिय सञ्चारमाध्यमहरूले इरानसँगको तनावका बीच यो विमान खसालिएको हुन सक्ने अड्कलबाजी गरे तापनि सेन्टकमले त्यसलाई पूर्णतः अस्वीकार गरेको छ । प्रारम्भिक अनुसन्धानकर्ताहरूले उडानका क्रममा दुई विमान एकापसमा ठोक्किएको हुन सक्ने सम्भावनामाथि अध्ययन सुरु गरेका छन् ।
दुर्घटनाग्रस्त विमानमा सामान्यतया चालक दलका ३ देखि ५ जना सदस्य रहने गर्छन् । यद्यपि, दुर्घटनाका बेला विमानमा कति व्यक्ति सवार थिए र उनीहरूको अवस्था कस्तो छ भन्नेबारे अमेरिकी सेनाले हालसम्म कुनै ठोस जानकारी सार्वजनिक गरेको छैन । सेन्टकमले हाल ‘फ्रेन्ड्ली एयरस्पेस’ (मैत्रीपूर्ण आकाश) मा तीव्र रूपमा उद्धार कार्य भइरहेको मात्र जानकारी दिएको छ ।
- ADVERTISEMENT -
केसी–१३५ अमेरिकी वायुसेनाको इतिहासमा सबैभन्दा धेरै प्रयोग हुने र भरपर्दो विमानमध्ये एक मानिन्छ । यसले लडाकु विमान, निगरानी गर्ने विमान र कार्गो विमानहरूलाई उडानकै क्रममा आकाशमै इन्धन भर्ने (एयर–टु–एयर रिफ्युलिङ) जटिल कार्य गर्दछ । यस्ता उडानहरू नियमित भए पनि खराब मौसम वा प्राविधिक जटिलताका कारण कहिलेकाहीँ यस्ता गम्भीर दुर्घटना हुने गर्छन् ।
यो विमान इरानविरुद्ध अमेरिका र इसराइलले गरिरहेको संयुक्त सैन्य गतिविधिका क्रममा प्रयोग भइरहेको द न्युयोर्क टाइम्सले उल्लेख गरेको छ । घटनाको विस्तृत विवरण र क्षतिको आधिकारिक पुष्टि हुन बाँकी छ ।
