छोरी बलात्कार गर्ने बाबुलाई जन्मकैद

भरतपुर । चितवन अदालतले १४ वर्षीया छोरीलाई बलात्कार गरेको आरोप लागेका खैरहनी नगरपालिका १ का ४२ वर्षीय पुरूषलाई जन्मकैद (२५ वर्ष)को सजाय तोकिदिएको छ । अदालतले हाडनातामा बलात्कार भएको पुष्टि गर्दै उक्त सजाय भएको हो । चितवन अदालतका न्यायाधीश विनोदकुमार गौतमको इजलासले मंगलबार यस्तो फैसला गरेको हो ।
०७५ चैत २१ गते राति आमा माइत गएको अवस्थामा आफ्नै बाबुले बलात्कार गरेको भन्दै पीडित आफैँले उजुरी दिएकी थिइन् । गत असोज २ गते हाडनाता करणीमा बाबुले छोरीलाई बलात्कार गरेको घटनामा चितवन अदालतले ४० वर्ष कैदको फैसला गरेको थियो ।
त्यसैगरी रत्ननगर नगरपालिका १५ घर भएका ४५ वर्षीय नीमबहादुर सुनारविरूद्ध चितवन अदालतले मंगलबार १ वर्ष ६ महिनाको कैद सजाय सुनाएको छ । साथै, १५ हजार जरिवाना पनि तोकिएको छ ।
न्यायाधीश प्रकाशकुमार अधिकारीको इजलासले उक्त सजाय सुनाएको श्रेस्तेदार रुद्रमणि गिरीले बताए । ११ वर्षीया बालिकालाई बलात्कार गरेको आरोपमा मुद्दा दायर भएको थियो । ०७६ जेठ ११ गते उक्त घटना भएको थियो ।
यसैगरी ६ वर्षीया बालिकालाई बलात्कार गरेको घटनामा भरतपुर २१ का वर्ष १६ का सुदीप विकलाई चितवन अदालतका जिल्ला न्यायाधीश हेमन्त रावलको इजलासले २ वर्ष कैद र २० हजार रूपैयाँ जरिवाना तोकेको छ ।
चितवन अदालतले असोज पहिलो हप्तामा ५ वटा बलात्कारसम्बन्धी घटना फैसला गरेको छ । दुईवटा हाडनाता करणीसँग सम्बन्धित हुन् भने बाँकी ३ वटा अरु बलात्कार घटना रहेका छन् ।