निःशुल्क स्यानिटाइजर तथा मास्क बैंक स्थापना

चितवन / राप्ती नगरपालिकाको भण्डारा बजारमा ह्यान्ड स्यानिटाइजिङ जोनसहितको निःशुल्क मास्क बैंक स्थापना गरिएको छ । भण्डारा युवा समाजले स्थापना गरेको सो मास्क बैंकको बिहीबार राप्ती नगरपालिकाका उपप्रमुख इमानसिंह लामाले उदघाटन गरेका छन् ।
समुदायस्तरमा व्यापक रुपमा कोरोना फैलिदै गएपछि मास्कको नियमित प्रयोग गर्न चिकित्सकहरुले आग्रह गरेका छन् । सोही अनुरुप हरेक मानिसलाई मास्क प्रयोग गराउनका लागि मानिसको भिडभाड हुने बजार क्षेत्रमा निःशुल्क मास्क वितरण गरिने भण्डारा युवा समाजका अध्यक्ष नविन दराइले जानकारी दिए ।
उनले न्यूनतम एक महिनासम्म सो कार्यक्रम सञ्चालनमा ल्याउने उद्देश्य रहेको बताए । कार्यक्रममा ईलाका प्रहरी कार्यालय भण्डाराका प्रमुख राजिव गिरी, राप्ती वडा नं. ४ का वडा अध्यक्ष शमशेर लामा, राप्ती न.पा. वडा नं. ५ का वडा अध्यक्ष मेनुका पाठक, राप्ती न.पा. वडा नं. ६ का वडा अध्यक्ष जल्लु चौधरी लगायतको उपस्थिति थियो ।
निःशुल्क माक्स बैंकबाट बिहिबार पहिलो दिन मै दुई हजार भन्दा बढी सर्वसाधरणले सेवा लिएको समाजका सचिव हरि सिलवालले जानकारी दिए ।