तीन जिल्ला अस्पतालमा अक्सिजन उत्पादन गर्न प्यान्ट जडान गरिँदै

मकवानपुर / बागमती प्रदेश सरकारले प्रदेशको तीन जिल्ला अस्पतालमा ठूलो परिणाममा अक्सिजन उत्पादन गर्न सकिने प्यान्ट जडान गरिँदैछ ।
प्रदेशको मकवानपुरको हेटौँडा, भक्तपुर र धादिङको जिल्ला अस्पतालमा ठूलो परिणाममा अक्सिजन उत्पादन गर्न सकिने प्यान्ट जडान गर्न प्रकृया सुरु गरिएको बागमती प्रदेश, सामाजिक विकास मन्त्रालयले जनाएको छ ।
मन्त्रालयका प्रवक्ता डा. पुरुषोत्तम राज सेढाईका अनुसार, उक्त जिल्लाहरुमा प्लान्ट राख्न सम्झौता भई निर्माणको अन्तिम चरणमा पुगेको छ ।
साथै प्रदेश सरकारले यसअघि प्रदेशको सिन्धुलीको जिल्ला अस्पताल र नुवाकोटको त्रिशूली अस्पतालमा प्लान्ट जडान गरी उत्पादनसमेत भइरहेको मन्त्रालयका प्रवक्ता डा. सेढाईले जानकारी दिए ।
‘प्रदेश सरकारले एउटा अक्सिजन प्लान्ट राख्न ८० लाख रुपैयाँ खर्च गर्दैछ,’ मन्त्रलायका प्रवक्ता डा. सेढाईंले भने, ‘सिन्धुली अस्पताल र त्रिशूली अस्पतालमा उत्पादनसमेत थालिएको छ ।’
कोरोनाको दोस्रो लहर तीब्र भइरहे पनि प्रदेशमा अक्सिजन अभाव हुन नदिन जिल्ला अस्पतालमा प्लान्ट जडान गरिने भएको मन्त्रालयले जनाएको छ ।
मन्त्रालयका अनुसार स्वास्थ्य आपूर्ति तथा व्यवस्थापन केन्द्र बागमती प्रदेशमा हाल ठूलो सिलिन्डर ८० थान मौज्दात छ । केन्द्र सरकारबाट पनि अक्सिजन सिलिन्डर उपलब्ध हुने क्रममा छ । प्रदेश सरकारले पनि सिलिन्डर खरिद प्रकृया अघि बढाएको छ ।
पाँचै अस्पतालबाट अक्सिजन उत्पादन सुरु भएपछि करिब १ हजार जनालाई अक्सिजन सिलिन्डर दिन सकिने डा. सेढाईंको अनुमान छ ।
यता, नुवाकोटको त्रिशूली अस्पतालले एक महिनादेखि अक्सिजन उत्पादन गर्दै आएको जनाएको छ । प्रतिमिनेट ३ सय घनलिटर अक्सिजन उत्पादन हुँदै आएको अस्पतालका मेडिकल सुपरिन्टेन्डेन्ट दिपेन्द्र पाण्डेले बताए ।
उनका अनुसार, अस्पतालका ५० शय्यामा अक्सिजन जडान रहे पनि ७६ थान थप सिलिन्डर मौज्दात राखिएको छ ।
त्यस्तै, सिन्धुली अस्पतालले जडान गरेको अक्सिजन प्लान्टले २४ घण्टामा १४ सय लिटर अक्सिजन उत्पादन गर्न सक्छ । प्लान्ट राखिए पनि बुस्टर आवश्यक पर्ने भएकोले त्यसको खरिद प्रक्रिया अघि बढाएको अस्पतालका मेसु उमेश प्रधानले जानकारी दिए ।